Ahabanza Imikino

Kepler VC na Police WVC zegukanye igikombe cyo Kwibohora - AMAFOTO + VIDEO

Yanditswe na: ISHIMWE Olivier Ba
Taliki:29/07/2024 9:42 0

Ikipe ya Kepler VC na Police mu bagore, zegukanye irushanwa ryo Kwibohora ryakinwaga ku nshuro ya Kabiri.

Ku cyumweru twashoje tariki 28 Nyakanga, nibwo hashojwe irushwanwa ry'iminsi 3 ya Volleyball ryiswe Liberation Cup. Ni rushanwa ryari ryitabiriwe n'amakipe 4 ya mbere muri shampiyona y'umwaka ushize muri Volleyball mu bagabo n'abagore.

Iyi mikino yatangiye ku wa Gatanu ubwo mu bagore ikipe ya APR VC yageraga ku mukino wa nyuma itsinze Ruhango, naho ku wa 6 Police VC igera ku mukino wa nyuma itsinze RRA. Ku wa Gatanu mu bagabo Police VC yageze ku mukino wa nyuma itsinze APR VC no ku wa Gatandatu Kepler igera ku mukino wa nyuma itsinze REG VC.

Ku iri cyumweru nibwo ikipe ya Kepler VC mu bagabo yahuye na Police VC ku mukino wa nyuma warangiye Kepler itsinze Police VC amaseti 3-1.

Iseti ya mbere, Kepler VC yatsinze Police VC ku manota 25-18, igaragaza ko ifite intego yo kwitwara neza muri uyu mukino. Gusa, Police VC nayo yagaragaje ko itarambirije ku gutsindwa, ikora uko ishoboye itsinda iseti ya kabiri ku manota 25-20.

Mu iseti ya gatatu, Kepler VC yagaragaje ko idashaka gutakaza amahirwe yo kwegukana igikombe itsinda Police VC ku manota 25-20. Iyi seti yabaye ngombwa cyane kuko Kepler VC yashakaga kugaruka mu mukino no gukomeza kuyobora umukino.

Iseti ya kane, ari nayo ya nyuma, yagaragaje imbaraga n’ubuhanga bw’abakinnyi ba Kepler VC, batsinda Police VC ku manota 25-18. Ibi byatumye Kepler VC yegukana igikombe cya Liberation Cup mu bagabo, ishimangira ko ari ikipe ikomeye kandi ifite intego yo gukomeza kwitwara neza mu marushanwa atandukanye ari imbere.

Mu bagore umukino wa nyuma wari wabanje, ikipe ya Police VC yatsinze APR VC amaseti 3-1. Wari umukino ukomeye ku makipe yombi, nyuma y'uko APR WVC yari yageze ku mukino wa nyuma, itsinze ikipe ya Ruhango amaseti 3-0, ni mu gihe ikipe ya Police WVC yo yari yatsinze Rwanda Revenue Authority amaseti 3-1, Police WVC yashakaga igikombe , kugira ngo yihimure kuri APR WVC yayitwaye igikombe cya shampiyona.

Ikipe ya Police WVC niyo yinjiye mu mukino neza, itsinda iseti ya mbere amanota 27-25, iseti itari yoroshye ku mpande zombi, iseti ya 2 ikipe ya Police WVC yayitsinze biyoroheye cyane ku manota 25-13 , ikipe ya APR WVC yahise igaruka mu mukino itsinda iseti ya 3 , amanota 25-16, mu gihe iseti ya 4 Police WVC, yayitsinze ku manota 25-20.

Police WVC na Kepler zibaye ikipe za mbere zitwariye igikombe muri Petit Stade, nyuma yo kuvugururwa, aho yari imaze imyaka isaga 2 iri kubakwa ndetse iyi mikino ikaba yarabaye mu buryo bwo gutaha iki kibuga.