Ahabanza Imikino

Eric Ten Hag yongereye amasezerano yo gutoza Manchester United

Yanditswe na: ISHIMWE Walter
Taliki:4/07/2024 13:32 0

Umuhorandi w'imyaka 54 y'amavuko Eric Ten Hag, nyuma y'uko yari amaze imyaka ibiri atoza Manchester United, yongereye indi myaka ibiri nyuma yo gutanga umusaruro mwiza muri iyi kipe.

Mu masaha ya mu gitondo kuri uyu wa Kane ni bwo Manchester United ibarizwa mu Bwongereza yongereye amasezerano y'imyaka ibiri, umutoza wayo Eric Ten Hag.

Muri 2022 ni bwo Eric Ten Hag yageze muri Manchester United, avuye muri Ajax yo mu Buhorandi. Amasezerano ye yasinye akigera muri Manchester United, yari kurangira mu 2025, ariko kubera kwitwara neza mu myaka ibiri amaze mu ikipe no kugaragaza ko ayiganisha aheza, yongereye amasezerano azarangira muri 2026.

Kuva yagera muri Manchester United avuye muri Ajax, Eric Ten Hag amaze guhesha Manchester United ibikombe bibiri, bisobanuye ko nta mwaka wapfuye Ubusa kuri uyu mutoza wavuye muri Ajax.

Akimara kongera amasezerano, Eric Ten Hag yagize ati "Nanyuzwe n'ibiganiro nagiranye n'ikipe byo kongera amasezerano. Usubije amaso inyuma, usanga naratwaye ibikombe bibiri mu myaka ibiri maze, kandi usanga ari byiza ukurikije uko ikipe nayisanze. Turacyafite umukoro wo gukora cyane, kugira ngo twubake ikipe abakunzi ba Manchester United bifuza.

Mu mwaka wa mbere wa Eric Ten Hag, Manchester United yasoje ari iya gatatu muri English Premier League. Muri uwo mwaka kandi, Manchester United yongeye kumva uburyohe bw'igikombe nyuma y'imyaka itandatu itari izi uko gisa, nyuma yo kwegukana Clabao Cup itsinze Newcastle United ku mukino wa nyuma.

Umwaka wa kabiri kuri Eric Ten Hag, wamubereye mubi, kuko yasoje umwaka w'imikino muri English Premier League ku mwanya wa Munani, ndetse Manchester United isoza ari iya myuma mu matsinda ya UEFA Champions League.

Kuba yaritwaye nabi mwene ako kageni byatumye ubuyobozi bwa Manchester United bupanga gutandukana na Ten Hag, gusa ibitego bibiri kuri kimwe yatsinze Manchester City ku mukino wa nyuma wa FA Cup, byatumye abayobozi ba Manchester United bahindura ibitekerezo, nuko bahitamo kumwongerera amasezerano.