Mutsinzi Ange yerekeje mu ikipe izakina Europa League

Uyu mukinnyi ni we wabyitangarije abinyujije ku mbuga nkoranyambaga ze ku mugoroba wo kuri uyu wa Mbere. Mutsinzi Ange yasinyiye iyi kipe ya Zira FK amasezerano y'imyaka 3 azamugeza muri 2027 nk'uko amakuru abivuga.

Uyu myugariro wo hagati (Centre-back) yerekeje muri iyi kipe avuye muri FK Jerv ikina shampiyona y'icyiciro cya Kabiri muri Norway nayo yari yaragezemo mu mwaka ushize wa 2023 avuye muri Clube Desportivo Trofense yo muri Portugal.

Mutsinzi Ange mbere yo kujya gukina muri iyi kipe yo muri Portugal, yari yabanje gukinira amakipe yo mu Rwanda. Muri 2015 yakinaga muri AS Muhanga, muri 2016 yerekeza muri Rayon Sports ahamara imyaka 3 ahita abona kwerekeza muri APR FC ahamara imyaka 2.

Ikipe ya Zira FK yasinyishije uyu mukinnyi w'Amavubi isanzwe ikina shampiyona y'icyiciro cya mbere muri Azerbaijani ikaba yarashinzwe muri 2014. 

Iyi kipe yabaye iya 2 muri shampiyona iheruka isanzwe inakina amarushanwa yo ku mugabane w'Iburayi nk'aho muri 2017 yakinnye Europa League, mu mwaka ushize ikina Conference League none no muri uyu mwaka yabonye itike Europa League.

Iyi kipe izahera mu cyiciro kibanza icakirana na FC Sheriff Tiraspol yo muri Moldova.

Mutsinzi Ange wasinyiye Zira FK amasezerano y'imyaka 3 ari umukinnyi wayo 

Mutsinzi Ange yerekeje mu ikipe izakina Europa League ya 2024-25