Ahabanza Imikino

Euro 2024: U Bufaransa bwakatishije itike ya 1/4 nta nkuru

Yanditswe na: Aloys Niyonyungu
Taliki:1/07/2024 20:20 0

Ikipe y'igihugu y'u Bufaransa yatsinze ikipe y'igihugu y'u Bubiligi bigoranye yerekeza muri 1/4 cy'irushanwa rihuza amakipe y'ibihugu yo ku mugabane w'Iburayi rya Euro ya 2024 riri kubera mu Budage.

Ni mu mukino wa 1/8 wakinwe kuri uyu wa Mbere Saa kumi n'ebyiri z'umugoroba ukinirwa kuri Merkur Spiel Arena.

Umukino watangiye ikipe y'igihugu y'u Bufaransa ariyo iri guhererekanya umupira neza ndetse ikanarema uburyo imbere y'izamu nk'aho Antoine Griezmann yarekuye ishoti gusa birangira Koen Casteels arikuyemo.

Nubwo ikipe y'igihugu y'u Bubiligi itagumanaga umupira umwanya munini, gusa yawubonaga igahita ishaka uko igera imbere y'izamu ariko abakinnyi barimo Kevin De Bryne na Jeremy Doku bakagerageza amahirwe ariko ntibibakundire.

Ku munota wa 33 ikipe y'igihugu y'u Bufaransa yashoboraga kuba yafunguye amazamu ku mupira wahinduwe na Jule Kounde, maze Marcus Thuram ashyiraho umutwe ariko birangira unyuze iruhande gato cyane.

Mbere y'uko igice cya mbere kirangira, abakinnyi b'ikipe y'igihugu y'u Bufaransa bihariye umupira cyane ariko aho kumenera ngo bagere mu izamu hakaba ari ho haba ikibazo.

Mu gice cya kabiri ikipe y'igihugu y'u Bufaransa yaje ikomeza kwatsa umuriro imbere y'izamu ry'u Bubiligi ishaka igitego ku bubi no ku bwiza. Ku munota wa 48 NG'OLO Kante yasunikiye umupira Aurelien Tchouaméni arekura ishoti riremeye ariko umunyezamu arishyira muri koroneri.

Abasore b'u Bufaransa bakomeje gukina bagerageza amahirwe imbere y'izamu ariko ntibahirwe nk'aho Kylian Mbappé yazamutse acenga neza ageze imbere y'urubuga rw'amahina arekura ishoti ariko rinyura hejuru y'izamu gato cyane.

Ku munota wa 70 ikipe y'igihugu y'u Bubiligi nayo yabonye uburyo buremereye imbere y'izamu ku mupira Orel Mangala yari ahaye Romelu Lukaku, gusa atinda gutereka umupira mu nshundura, birangira bawumukuyeho.

Bigeze ku munota wa 85 ikipe y'igihugu y'u Bufaransa yisirisimbije imbere y'izamu maze Jule Kounde ahereza umupira Randal Kolo Muani wari winjiye mu kibuga asimbuye nawe arekura ishoti riragenda rikubita ku birenge bya Jan Vertonghen ahita yitsinda.

Umukino warangiye ikipe y'igihugu y'u Bufaransa itsinze u Bubiligi igitego 1-0 ihita ikatisha itike ya 1/4 cya Euro ya 2024 aho igomba kuzacakirana n'ikipe y'igihugu irava hagati ya Portugal na Slovenia.