Copa America: Argentina yageze muri kimwe cya Kane, Canada nayo ibona intsinzi

Mu gitondo cyo kuri uyu wa Gatatu, imikino ya Copa America 2024 yakomezaga muri Leta Zunze Ubumwe za Amerika, aho hakinwaga imikino ya kabiri mu itsinda rya A. Ikipe y'igihugu ya Argentina yatsinze Chile, naho Canada itsinda Peru.

Imikino ya kabiri mu itsinda A, yabimburiwe n'umukino wahuje ikipe y'igihugu ya Canada, ubera kuri Children's Mercy Park, usifurwa n'umunya Guatemala, Mario Escobar.

Ikipe y'igihugu ya Canada yari inyotewe no kubona amanota atatu, kubera ko umukino wa mbere yari yaratsinzwe na Argentina, yakoze uko bishoboka, nuko igice cya mbere kirangira nta gitego irabona mu izamu ra Peru.

Ku munota wa 59 akazi ka Canada korohejwe n'uko abakinnyi ba Peru basigaye ari 10, nyuma y'uko myugariro wayo  Miguel Araujo yari ahawe ikarita itukura.

Canada yari ifite ubusatirizi buyobowe na Jonathan David, yagumye kotsa igitutu izamu rya Peru, nuko ku munota wa 74 Jonathan David atsindira Canada igitego ku mupira yahawe na Jacob Shaffelburg.

Igitego cya Jonathan David ku munota wa 74, ni nacyo cyasoje umukino, nuko Canada ibona intsinzi yayo ya mbere muri Copa America 2024.

Jonathan David yafashije Canada kubona amanota atatu ya mbere muri Copa America 2024 

Nyuma y'uko Canada yishimiye kubona amanota atatu ya mbere muri Copa America 2024, ikipe y'igihugu ya Argentina yo yishimiye ko ari igihugu cya mbere cyageze muri kimwe cya Kane itsinze Chile igitego kimwe ku busa.

Umukino wa Argentina na Chile  wabereye kuri MetLife Stadium, New Jersey, usifurwa na Andres Matonte ukomoka muri Uruguay.

Muri uyu mukino nta mpuhwe ikipe y'igihugu ya Argentina yari ifite, kuko yari yamanukanye intwaro zose nka Enzo Fernandez, Nicolás González, Rodrigo De Paul, Alexis Mac Allister, Julián Alvarez, Lionel Messi ndetse n'abandi.

Nubwo Argentina yari yamanukanye izo ntwaro, umukino wageze ku munota 87 nta kipe irabasha kurunguruka mu izamu rya mugenzi wayo, kubera ugufungana hagati y'abatoza bombi.

Ku munota wa 88, Lautaro Martínez uzwi muri Inter Milan, yatsindiye Argentina igitego cyaje ari ingusho kuri Chile yari yihanganye iminota 87, icyo gitego ni nacyo cyasoje umukino.

Argentina yabaye ikipe y'igihugu ya mbere igeze muri kimwe cya Kane muri Copa America 2024 

Kwitwara neza kwa Argentina byazamuye icyizere cya Lionel Messi cyo kongera guhesha Argentina igikombe 

Gutsinda uyu mukino, byatumye Argentina igera muri kimwe cya Kane n'amanota atandatu, Canada yo iracyategereje uko bizagenda mu mukino wa gatatu ifite amanota atatu, naho Chile na Peru zo ziracyafite inota rimwe ryavuye mu mukino wa mbere zanganyije.

Imikino ya kabiri mu matsinda ya Copa America, irakomeza mu rukerera rwo ku wa Kane, aho amakipe yo mu itsinda B azesurana. Imikino iteganyijwe ni Ecuador izakina na Jamaica naho Mexico yesurane  na Venezuela.