Leta Zunze Ubumwe za Amerika, zatangiye gukubita agatoki ku kandi muri Copa America

Mu gitondo cyo ku wa Mbere, mu gace ka Arlington muri Texas, ni bwo ikipe y'igihugu ya Leta Zunze Ubumwe za Amerika iri mu itsinda rya C, izakina umukino wa mbere muri Copa America, ikina na Bolivia.

Ku itariki 20 Kamena, Leta Zunze Ubumwe za Amerika zakiriye inkuru nziza ko ku rutonde ngarukakwezi rwa FIFA iri ku mwanya wa 11 ku rwego rw'isi, ibi bikaba byarayongereye imbaraga zo kuzitwara neza muri Copa America, nk'igihugu kiri mu myanya 11 ya mbere ku Isi.

Ikipe y'igihugu ya Bolivia izaba icakirana na Leta Zunze Ubumwe za Amerika ku wa Mbere, yo ntabwo yisanze ihagaze neza ku rutonde ngarukakwezi rwa FIFA, cyane ko yisanze ku mwanya wa 84. 

Kuba Leta Zunze Ubumwe za Amerika irusha kure Bolivia imyanya muri FIFA, ni imwe mu mpamvu ishingirwaho igaragaza ko umukino wa mbere ushobora gutangira utanga amahirwe kuri Leta Zunze Ubumwe za Amerika yo kwitwara neza muri Copa America.

Uretse Bolivia ya 84, ibindi bihugu biri kumwe na Leta Zunze Ubumwe za Amerika mu itsinda C, nabyo nta na kimwe kiyiri imbere mu rutonde ngarukakwezi rwa FIFA. Ibihugu biri kumwe nayo ni Panama ya 43, na Uruguay iri ku mwanya wa 14.

Iyo mibare ituma na bamwe mu bagize ikipe y'igihugu ya Leta Zunze Ubumwe za batangira kwigamba ko ikipe yabo yamaze kurenga amatsinda ya Copa America, ahubwo gahunda ari ugutangira gutekereza uko ikipe izitwara neza mu mikino yo gukuramo (Knockout).

Tyler Adam's ukina mu kibuga hagati mu ikipe y'igihugu ya Leta Zunze Ubumwe za Amerika yagize ati " Kuri nge, mbona twaramaze kugera muri kimwe cya Kane tutarakina umukino n'umwe. Icyo dukeneye, ni ugukina twirinda ko twazaba aba kabiri, bikazadusunikira guhura n'ikipe ikomeye muri kimwe cya Kane.

Myugariro Mark McKenzie we yagize ati " Niba wararebye imikino tumaze iminsi dukina, twigiyemo byinshi, yewe na Colombia yadutsinze   ibitego bitanu. Gusa tumaze kubona isura nziza y'ikipe yacu, kuburyo navuga ko muri Copa America duhagaze neza.

Kugeza ubu, ibihugu navuga bikwiye kudutera ubwoba, ni ibihugu byegukanyeho igikombe Cy'Isi. Ibyo ni Uruguay, Brazil na Argentina. Turacyafite amahirwe yuzuye yo guhangana. Turabizi ko ari irushanwa ritegurwa na CONMEBOL yo muri America Y'Epfo, gusa kuba natwe turimo, ntiduhejwe mu kuritwara."

Kugeza ubu muri Copa America 2024, hamaze gukinwa imikino ibiri yo mu itsinda A. Umukino wa mbere Argentina yatsinze Canada ibitego bibiri ku busa, naho umukino wa kabiri Peru igwa miswi na Chile Ubusa ku busa.

Ikipe y'igihugu ya Leta Zunze Ubumwe za Amerika yatangiye gukubita agatoki ku kandi ko izitwara neza muri Copa America 

Tyllor Adam's we abona Leta Zunze Ubumwe za Amerika yaramaze kugera muri kimwe cya Kane muri Copa America 2024 

Leta Zunze Ubumwe za Amerika irashaka kwegukana Copa America 2024