Gasogi United yatandukanye n’abandi bakinnyi 4

Mu ijoro ryo kuri uyu wa Kane rishyira ku wa Gatanu, ni bwo ikipe ya Gasogi United yashyize ahagaragara abakinnyi bagera kuri 4 batazakomezanya nayo mu mwaka w'imikino 203-24. 

Muri aba bakinnyi barimo Niyitegeka Idrissa wari Kapiteni w'iyi kipe. Idrissa ni umwe mu bakinnyi bitwaye neza muri uyu mwaka w'imikino aho yakinnye imikino isaga 32 muri shampiyona no mu gikombe cy'Amahoro.

Abantu benshi batunguwe no kubona uyu musore atazakomezanya na Gasogi United, gusa amakuru ari ku ruhande akavuga ko uyu musore atumvikanye n'ubuyobozi bwa Gasogi United ku byo yasabaga.

Mu bandi bakinnyi iyi kipe yatandukanye nabo harimo; Mugabe Robert, umunyezamu Ntagisanayo Serge ndetse na Rugangazi Prosper.

Aba bakinnyi baje basanga abandi bakinnyi 3 Gasogi United iherutse gutandukana nabo barimo; Mbirizi Eric, Ngono Guy Herve ndetse na myugariro Henock Yao.

Amakuru ava mu buyobozi bw'ikipe ya Gasogi United avuga ko iyi kipe ishaka kuzamura abakinnyi bagera kuri 5 bavuye mu ikipe y'abato, ndetse ikagura n'abandi bazafatanya n'abo bakiri bato. Gasogi United yasoreje ku mwanya wa 9 n'amanota 36 ku rutonde rwa shampiyona.

Niyitegeka Idrisaa yatunguye abantu benshi kuba yatandukanye na Gasogi United