Igisoro cyagarutse! Irushanwa ry'Umurenge Kagame Cup 2024 rirasorezwa i Rubavu

Mu mpera z'iki cyumweru turimo hagati ya tariki 4 na tariki 5 Gicurasi mu Karere ka Rubavu na Musanze, hazasorezwa imikino ngarukamwaka y'umurenge Kagame Cup 2024.

Iyi mikino igiye gukinwa ku nshuro ya 18, izakinwa mu byiciro bigera ku 8 birimo; umupira w'amaguru, Volleyball, Basketball, Sitball, gusiganwa ku magare, gusiganwa ku maguru, ndetse n'imikino gakondo irimo gusimbuka urukiramende, ndetse no kubuguza igisoro.

Tariki 4 Gicurasi mu Karere ka Musanze, hazabera irushanwa ryo gusiganwa ku maguru rizabera ku kibuga cy'Ubworoherane, ikibuga gikuru cy'akarere ka Musanze. Indi mikino yose isigaye izabera mu Karere ka Rubavu, ari naho hazatangirwa ibihembo kuri sitade Umuganda ku cyumweru tariki 5 Gicurasi 2024.

Uko gahunda y'Imikino iteye 

Amarushanwa Umurenge Kagame Cup y’uyu mwaka afite insanganyamatsiko igira iti “Imyaka 30 y’imiyoborere ishyira umuturage ku isonga”. Iyi nsanganyamatsiko yatoranyijwe mu rwego rwo kugaragaza uruhare imiyoborere myiza igira mu iterambere ry’ u Rwanda, no gutanga ubutumwa ku baturage ko bakwiye gukomeza kugira uruhare mu gusigasira ibyo igihugu cyagezeho mu nzego zose kibikesha imiyoborere myiza.

Amarushanwa Umurenge Kagame Cup yatangiye mu mwaka wa 2006, atangira yitwa “Amarushanwa y’Imiyoborere Myiza” agamije kwimakaza amahame y’imiyoborere myiza. Mu mwaka wa 2010, aya marushanwa yahinduriwe inyito yitwa “Umurenge Kagame Cup” mu rwego rwo kugaragaza no gushimira Nyakubahwa Perezida wa Repubulika y’u Rwanda, Paul Kagame uruhare rwe rukomeye mu miyoborere myiza n’inkunga atanga mu iterambere rya Siporo mu Rwanda no mu karere igihugu cyacu giherereyemo. 

Amarushanwa y“Umurenge Kagame Cup” yatekerejwe kandi mu rwego rwo gutanga amahirwe n’uburyo bwo guhuza abaturage mu Mirenge yabo binyujijwe muri siporo.

Aya marushanwa y’Umurenge Kagame Cup ategurwa ku bufatanye bw’inzego zitandukanye zirimo MINISPORTS, MINALOC, RGB, Intara n’Uturere n’Amashyirahamwe y’Imikino itandukanye mu Rwanda.

Mu mukino wo kubuguza, buri ntara itanga abakinnyi bahize abandi ubundi bagahanganira hamwe 

Mu gusiganwa ku magare hakoreshwa amagare asanzwe twakwita gakondo 

Munyetwari Alphonse uyobora FERWAFA, akazi ka mbere akigera muri iyi nzu, yitabiriye imikino y'Umurenge Kagame Cup yabereye i Huye umwaka ushize

Musanze niyo ibitse igikombe cya Basketball mu bagore 

Igikombe cy'Umurenge Kagame Cup mu mupira w'amaguru kibitswe n'umurenge wa Kicukiro ariko uyu mwaka ntabwo wahiriwe