Ahabanza Imikino

Ibya Harry Kane ni ugutsinda igikombe kikigira ahandi

Yanditswe na: ISHIMWE Walter
Taliki:27/04/2024 20:28 0

Harry Kane yatsinze ibitego bibiri byafashije Bayern Munich kwegukana amanota atatu, nyamara igikombe cyamaze kugera mu ntoki za Bayer Leverkusen.

Harry Kane yatsinze ibitego bibiri byahesheje Bayern Munich amanota atatu, mu mukino Bayern Munich yakinaga na Eintracht Frankfurt kuri Allianz Arena.

Harry Kane yavuye mu Bwongereza ajya muri Bayern Munich atari uko yananiwe gutsinda ibitego, ahubwo ari ukugira ngo ibitego atsinda bihabwe agaciro yegukane igikombe.

Kugeza ubu, Harry Kane ni umwe mu bakinnyi batsinze ibitego byinshi muri English Premier League, gusa nta gikombe na kimwe yigeze atwarira muri Tottenham.

Ku myaka 30 y'amavuko nta gikombe na kimwe aratwara haba muri Tottenham, mu ikipe y'igihugu y' u Bwongereza, ndetse no mu gihe gito amaze muri Bayern Munich ibikombe bitandukanye byamuciye mu myanya y'intoki.

Harry Kane yasanze Bayern Munich imaze gukina myaka 11 yikurikiranya itwara igikombe cya shampiyona. Umwaka we wa mbere muri Bayern Munich, umukino yakinnye bwa mbere Bayern Munich yatakaje ikikombe cya Super Cup ubwo yatsinzwe na LB Leipzig.

Bayern Munich yamaze gusezererwa mu gikombe cy'igihugu, ndetse yanamaze gukura amaso ku gikombe cya shampiyona.

Bisobanuye ko Harry Kane aramutse ari uzatwara igikombe yazegukana UEFA Champions League, dore ko ariyo Bayern Munich igifite amahirwe yo kwegukana.

Ibitego bibiri bya Harry Kane yatsinze Eintracht Frankfurt, byatumye yuzuza ibitego 35 amaze gutsindira Bayern Munich muri Shampiyona yo mu Budage.

Harry Kane utezwe amaso muri UEFA Champions League, azahangana na Real Madrid muri kimwe cya kabiri, gukina na Real Madrid akaba ari impamvu ikekwa ko Bayern Munich itazapfa kwirenza kaimwe cya kabiri.