Abategura Champions League bafatiye ibihano FC Barcelona

Taliki ya 10 z'uku kwezi ni bwo ikipe ya Paris Saint-Germain yakiraga ikipe ya FC Barcelona kuri Parc de Princes mu mukino ubanza wa 1/4 cya UEFA Champions League.

Ni umukino warangiye FC Barcelona itsinze ibitego 3-2 Paris Saint-Germain yari imbere y'abafana bayo. Muri uyu mukino ariko abafana ba FC Barcelona bakoze ibintu bitemewe bacana imiriro, bangiza intebe za sitade bari bicayemo banakora ibikorwa byerekana irondaruhu.

Kuwa Kane taliki ya 18 Mata ni bwo UEFA itegura imikino ya Champions League yafatiye ibihano iyi kipe iyica amafaranga. FC Barcelona yaciwe agera ku bihumbi 2 by'Amayero kubera abafana bayo bakije amatara kongeraho ibindi bihumbi 5 byo kubera ko bangije sitade ya Paris Saint-Germain.

FC Barcelona kandi yanategetswe ko igomba kujya gusana ibyangijwe n'abafana bayo muri sitade ya Paris Saint-Germain birimo intebe mu gihe kitarenze iminsi 30.

Kubera ibijyanye n'irindaruhu ryakozwe n'abafana bayo, FC Barcelona yaciwe ibihumbi 25 by'Amayero ndetse umukino izongera gukinira hanze mu mikino yo ku mugabane w'Iburayi nta mufana n'umwe wayo uzaba wemerewe kugura itike ngo awurebe.

Aya makosa naramuka yongeye kwisubiramo uzafatitwa n'ibihano byo kutagurisha itike ku bafana bayo ku mukino wo ku mugabane w'Iburayi bazakira. Muri rusange, ibi bihano FC Barcelona yafatiwe bingana n'ibihumbi 32 by'amayero.

FC Barcelona yafatiwe ibihano kubera abafana bayo

Abafana ba FC Barcelona bakoze ibikorwa bitemewe none ikipe yabo yafatiwe ibihano