Inzego z'umutekano z'u Rwanda z'iri mu Butumwa bw'Amahoro zibutse Jenoside yakorewe Abatutsi mu 1994

Kuri iki Cyumweru taliki 7 Mata nibwo Perezida Kagame na Madamu Jeannette Kagame batangije ibikorwa byo Kwibuka ku Nshuro ya 30 Jenoside yakorewe Abatutsi mu 1994 hacanwa Urumuri rw'icyizere.

Ni igikorwa cyabereye ku Rwibutso rwa Jenoside rwa Kigali aharuhukiye imibiri y’abazize Jenoside yakorewe Abatutsi irenga ibihumbi 250.

Bamwe mu Banyarwanda bari mu bihugu bitandukanye nabo bibutse Inzirakarengane zazize uko zavutse.  

Minisiteri y'Ingabo ibinyujije ku rubuga rwayo rwa X yatangaje ko Ingabo z'u Rwanda ziri kubangabunga amahoro muri Repubulika ya Centrafrique zifatantije n'Abanyarwanda baba muri iki gihugu n'inshuti zabo mu gikorwa cyo Kwibuka ku nshuro ya 30 Jenoside yakorewe Abatutsi mu 1994.

Ni igikorwa cyabereye ahitwa Bangui, Bria na Bossembélé Base. 

Mu gace ka Bangui, mu nkambi ya Socatel M'poko, Lt Col Joseph Gatabazi yashimiye inshuti zifatanyije n'Abanyarwanda Kwibuka ku nshuro ya 30, naho mu gace ka Bria ho Col Dr Theogène Rurangwa, aganira ku mizi y’amateka ya Jenoside yasabye  Isi yose guhagurikira kurwanya ingengabitekerezo ya Jenoside.

Usibye muri Repulika ya  Centrafrique no muri Sudani y'Epfo naho Ingabo n'Abapolisi b'u Rwanda bari mu butumwa bw'amahoro bifatanyije n'Abanyarwanda baba muri iki gihugu Kwibuka ku Nshuro ya 30 Jenoside yakorewe Abatutsi mu 1994.

Ni igikorwa cyabereye mu mujyi wa Juba mu kigo cy'Umuryango w'Ababibumbye kikaba cyari kitabiriwe n'abarimo Visi Perezida wa Sudani y'Epfo, Nyakubahwa Rebecca Nyandeng de Mabior, Ambasaderi Mukuru w’u Rwanda muri Uganda na Repubulika ya Sudani y'Epfo, Col (Rtd) Joseph Rutabana aherekejwe na Col Emmanuel Ruzindana.

Mu ijambo rye, Visi Perezida Rebecca Nyandeng yagaragaje ko Jenoside yakorewe Abatutsi kuba yarabaye Isi yose irebera ntigire icyo ikora ngo iyihagarike ari intege nke ku kiremwa muntu cyose.

Inzego z'umutekano z'u Rwanda z'iri mu Butumwa bw'Amahoro zibutse ku Nshuro ya 30 Jenoside yakorewe Abatutsi 1994