Ahabanza Imikino

Los Angeles Lakers na Golden State Warriors zishobora kutazakina NBA Playoffs

Yanditswe na: ISHIMWE Walter
Taliki:26/03/2024 20:57 0

Ku itariki 14 Mata imikino ya NBA Regular Season izashirwaho akadomo maze amakipe 16 yitwaye neza azacakirane muri NBA Playoffs.

Kugira ngo hamenyekane amakipe 16 azakina NBA Playoffs, hatoranywa amakipe umunani meza mu Burasiraziba n'andi umunani meza mu Burengerazuba.

Amakipe yo muri buri gace atangira gukina akuranamo ahereye muri kimwe cya Kane.

Bivuze ko mu Burengerazuba hatangira imikino ya kimwe cya Kane ihuza amakipe umunani yabaye meza muri ako gace no mu Burasiraziba bikaba utyo.

Amakipe aguma gukuranamo kugeza ubwo muri buri gace haba mu Burengerazuba hasigara ikipe imwe yabaye iya mbere, ikazacakirana n'iyabaye iya mbere mu Burasiraziba.

Ayo makipe abiri aba yasigaye imwe yo mu Burasiraziba indi yo mu Burengerazuba, arahura akishakamo izaba iya mbere ikegukana NBA bidasubirwaho.

Los Angeles Lakers na Golden State Warriors zombi zo mu Burengerazuba, ntabwo zihabwa amahirwe yo kuzakina NBA Playoffs, kubera ko atagaragara mu makipe umunani meza mu gace k'Uburengerazuba.

Nubwo byabaho ko hagira ikipe imwe muri aya iza mu makipe umunani meza, ntabwo byakunda kuri yose kubera ko imbere yayo hari amakipe mato ariko afite gahunda nka Dallas Mavericks, Phoenix Suns na Sacramento Kings.

Kugeza ubu Los Angeles Lakers iri ku mwanya wa Cyenda, imaze gutsinda imikino 39, itsindwa 32.

Golden State Warriors yo ni iya Cumi yo imaze gutsindwa imikino 34, itsinda imikino 36. NBA Regular Season iramutse irangiye aya makipe akimeze gutya, ntabwo yazagaragara mu mikino ya NBA Playoffs, ubwo amakipe aba yatangiye gukina akuranamo.

Los Angeles Lakes na Golden State Warriors ziramutse zidakinnye NBA Playoffs, zaba ari ikipe ebyiri zicumbikiye abakinnyi bakomeye muri NBA baba babuze amahirwe yo gukina NBA Playoffs. Abo ni Stephen Curry wa Golden State Warriors na LeBron James wa Los Angeles Lakers.

Amakipe afite amahirwe yo kuzakina NBA Playoffs mu Burengerazuba ni Denver Nuggets, Oklahoma City Thunder, Minessota Timber Wolves, New Oliean Pelicans, Los Angeles Clippers, Sacramento Kings, Dallas Mavericks na Phoenix Suns.

Mu Burasiraziba amakipe ahabwa amahirwe yo kwegukana NBA Playoffs ni Boston Celitics, Milwauke Bucks, Cleveland Cavaries, New York Nicks, Orlando Magic, Indiana Pacers, Miami Heat na Philadelphia 76ers.