Nyuma y’imyaka 10 Orchestre Impala igiye gukora igitaramo cyayo bwite

Mu myaka 10 ishize, iri tsinda ryagaragaye mu bitaramo bikomeye birimo n’ibya Iwacu Muzika Festival, ibyategurwe n’uruganda rwa SKOL, Sosiyete n’ibigo bikomeye mu Rwanda, byose byari bigamije gufasha abakunzi b’abo kwizihirwa.

Ni itsinda ritanga ibyishimo ku bisekuru byombi! Ahanini bitewe n’ibihangano by’abo, ndetse n’uburyo bagiye biyegereza abafana b’abo mu bice bitandukanye.

Umunyamuziki Munyanshoza Dieudonne uri mu bagize iri tsinda, yabwiye InyaRwanda ko nyuma y’imyaka 10 ishize badategura igitaramo cyabo bwite, igihe kigeze kugirango bataramira abakunzi b’abo binyuze mu cyo bateguye.

Yavuze ko kudategura ibitaramo by’abo bwite, ahanini byaturutse ku rugendo bakoze rwo kongera kwiyubaka nk’itsinda no kuba barazitiwe n’ubushobozi bwanatumye badahita babona ibikoresho by’umuziki bari bakeneye.

Ati “Nibyo koko imyaka 10 irashize tudakora igitaramo cyacu bwite. Ariko hari impamvu nyinshi zagiye zibitera, zirimo nko kubura ubushobozi bwo kubitegura, urabizi gutegura ibitaramo bisaba amafaranga n’ubundi bushobozi butuma bishoboka.”

Akomeza ati “Twagiye turirimba mu bitaramo twabaga twatumiwemo, kuri iyi nshuro rero twarisuganyije dutekereza uko twakora igitaramo cyacu bwite twahuje no kwizihiza Umunsi wa Pasika.”

Amwe mu masomoo ya Kiliziya azirikanwa kuri uyu munsi harimo Isomo ryo 2: Abanyakolosi 3,1-4 hagira hati “Bavandimwe, ubwo mwazukanye na Kristu, nimuharanire ibyo mu ijuru, aho Kristu ari, yicaye iburyo bw’Imana; nimurangamire iby’ijuru, aho kurarikira iby’isi. Koko mwapfanye na Kristu, none ubugingo bwanyu bwihishe hamwe na We mu Mana. Aho Kristu azigaragariza, We bugingo bwanyu, icyo gihe namwe muzagaragara muri kumwe na We, mu ikuzo ryisesuye.”

Munyanshoza avuga ko muri uko kwitegura, baniyambaje umuhanzi ubimazemo igihe kinini, Makanyanga Abdul bazahurira ku rubyiniro. Aba bombi baherukaga guhurira mu gitaramo, Makanyaga yizihirijemo imyaka 50 ishize ari mu muziki.

Hari inkoranyamagambo yasobanuye ko Pasika ari “umunsi mukuru w’ingenzi Abakristo bizihiza, bibuka izuka rya Yesu Kristo.”

Munyanshoza akomeza avuga ko bari gutekereza n’abandi bahanzi bazafatanya muri iki gitaramo. Ati “Kugeza ubu Makanyaga niwe twamaze kwemeranya. Ntekereza ko mu gihe kiri imbere tuzaba twatangaje undi muhanzi tuzakorana cyangwa se n’izindi gahunda uko ziteye.”

Mima La Rose watangiranye n’iri tsinda, yavuze ko kugarura Orchestre Impala kari akazi katoroshye, kuko basabwaga arenga Miliyoni 7 Frw yo kugura ibikoresho by’umuziki.

Mu bushobozi yari afite, Munyanshoza Dieudonne yemeye gutanga Miliyoni 3 Frw hagurwa ibikoresho, ubundi Orchestre Impala yongera gusubiza mu ngamba.

Ubwo tariki ya 4 Mutarama 2024, bahuraga n’abafana b’abo, abagize iri tsinda, bagaragaje ko mu rugendo rwabo bagiye bahura n’ibicantege, birimo nko gutaramira mu Ntara, kenshi bakabura amafaranga yo kugaruka i Kigali

Munyanshoza yanashimye cyane ubuyobozi bw’Igihugu, anavuga ko bazagira uruhare mu matora ya Perezida n’abadepite, kuko hari ibihangano bari gutegura.

Mu bihe bitandukanye, Orcheste Impala yacurangiye abanyarwanda indirimbo zabashimsihije cyane kandi ifasha Leta mu gukangurira abaturage amajyambere n’ibindi.

Umwihariko wayo ni uko ari ryo tsinda ryamaze igihe kirekire ritarasenyuka nk'uko byagendekeraga andi matsinda mu bihe bitandukanye mu Rwanda.

Ryanyuzemo abahanga mu muziki nka Soso Mado, Tubi Lando, Mimi La Rose, Maitre Lubangi, Pepe larose, Semu, n'abandi.

Kandi bamamaye mu ndirimbo nka 'Nyiramaliza', 'Anita Mukundwa', 'Abagiramenyo', 'J’ai bien choisi', 'Anonciata', 'Ese ko Ugiye', 'Aliya', 'Goretti' n'izindi.

Orchestre Impala yatangaje ko igiye gukora igitaramo cyabo bwite nyuma y’imyaka 10 kizabera kuri Hill Top Hotel

Orchestre Impala yasobanuye ko bari bamaze igihe badakora igitaramo cyabo ahanini bitewe n’ubushobozi

Makanyaga Abdul yatangajwe mu bahanzi bazafasha Orchestre Impala muri iki gitaramo kigamije gusabana n’abakunzi b’abo

KANDA HANO WUMVE ZIMWE MU NDIRIMBO ZA ORCHESTRE IMPALA

">