Zikama Tresor yakoze mu nganzo ashengerera Umukiza aririmba " OH MESSIAH" -VIDEO

Zikama Tresor ubarizwa muri Ebenezer Holy Church, yashimiye Messiah wabohoye abanyabyaha ndetse akiyambura icyubahiro mu ijuru akaza mu Isi  akicwa nabo yaje gukiza.

Mu kiganiro  n’uyu muramyi, yatangaje ko indirimbo ze zikunze kugaruka ku murimo ukomeye Yesu Kristo yakoreye abantu, ndetse n’ibitangaza akora umunsi ku wundi.Yatangaje ko ahorana ishimwe ku mutima ibyo bikamutera gukunda Yesu.

Ati” Oh Messiah warakoze wowe wancunguye, urupfu rwawe rwambereye itangiriro ry’umunezero. Amazi n'amaraso byavuye mu rubavu rwawe Yesu, Si iby’ubusa nzabiririmba iteka ryose”.

Umuhanzi Zikama uherutse gushyira hanze amashusho y’indirimbo “ Emmanuel” yemeza ko  igitambo cya Yesu aricyo cyatumye umuntu ahabwa ijambo ndetse akabaho mu mudendezo mu gihe yari gupfa buheriheri iyo hataboneka umucunguzi.

Mu ndirimbo yagize ati “ Hallelluah! Yesu wanjye yarambohoye ndamushima Amen”.

Yatangarije InyaRwanda ko yahawe umugisha wo kuvugira Imana binyuze mu kuririmba indirimbo zibanda ku mucunguzi, wisize ubusa akambara ishusho y’abanyabyaha kugirango  akize ikiremwamuntu.

Asaba abantu bose gusobanukirwa igitambo batambiwe, ndetse akabasaba gukurikira indirimbo ze kuko zirimo ubutumwa bwiza bubegereza Imana ndetse bagasobanukirwa kugira neza kwayo.

KANDA HANO UNYURWE N'UBUTUMWA BURI MU NDIRIMBO " OH MESSIAH" YA ZIKAMA TRESOR