Twakoze amateka! Imbamutima za Tyla wegukanye Grammy ku myaka 22

Mu ijoro ryo ku Cyumweru tariki 04 Gashyantare 2024 nibwo hatanzwe ibihembo bya Grammy Awards 2024 byari bitanzwe ku nshuro ya 66.

Aha niho umuhanzikazi w’imyaka 22 y’amavuko ukomoka muri Afurika y’Epfo, Tyla Laura Seethal [Tyla] yandikiye amateka adasanzwe agahigika abarimo Davido n’abandi bari bahataniye igihembo.

Abinyujije ku rubuga rwa Instagram, Tyla yatangaje ko atewe ishema no kubimburira abandi bahanzi nyafurika mu gutwara igihembo cyashiriweho abanyafurika mu bihembo mpuzamahanga muri muzika bya Grammy Awards.

Yagize ati: “Nshimishijwe cyane no kuba natsindiye bwa mbere Grammy muri iki cyiciro gishya… twakoze amateka!

Tyla yegukanye icyiciro cya Best Music African Performance mu bihembo bya Grammy Awards byatangiwe I Los Angeles

Uyu muhanzikazi kandi yashimiye byimazeyo abafana be bahuriye mu itsinda ryitwa ‘Tygers,’ ashimira itsinda ry’amabufasha gutunganya ibihangano bye harimo mu buryo bw’amajwi ndetse n’amashusho.

Tyla kandi, yaboneyeho gushimira abahanzi nyafurika bose batoranijwe ndetse n’abegukanye ibihembo, ati: “Afurika ku isi hose.”

Yasinyanye amasezerano n’inzu itunganya umuziki ya Epic Records mu 2021 nyuma y’uko akoze indirimbo ya mbere mu 2019 yise "Getting Late" yakoranye na Kooldrink.

Taylaa atangaje akari ku mutima we, nyuma y’uko umukuru w’igihugu cya Afurika y'Epfo, Cyril Ramaphosa yatunguranye mu mbyino idasanzwe y’injyana y’indirimbo ‘Water,’ yishimira insinzi uyu mukobwa yazanye mu gihugu ayoboye.

Tyla yatangaje ko yishimiye kuba umuhanzi nyafurika wa mbere wegukanye Grammy mu cyiciro gishya gishyizweho vuba muri ibi bihembo

Yegukanye igihembo cya Grammy ku myaka 22 gusa y'amavuko

Indirimbo ye 'Water' yanamuhesheje iki gihembo yamenyekanye cyane ubwo yazaga mu Rwanda akayibyinira muri BK Arena mu buryo budasanzwe