AFCON 2023: Misiri yaguye miswi na Ghana mu mukino Mohammed Salah yavunikiyemo

Ni umukino wo mu itsinda B wabaye kuri Uyu wa Kane saa yine z'ijoro ubera kuri Felix Houphouet-Boigny.

Uko wagenze muri make 

Umukino watangiye amakipe yombi akinira mu kibuga hagati ariko ikipe y'igihugu ya Misiri ikoresheje abakinnyi barimo Mostafa Mohammed na Mohammed Salah ikagerageza kugera imbere y'izamu rya Ghana.

Ku munota wa 25 Jordan Ayew yazamukanye umupira yihuta awuhinduye ashaka Antoine Semenyo ariko ba myugariro ba Misiri baba maso.

Ku munota wa 38 ikipe y'igihugu ya Misiri yabonye kufura nziza ariko Omar Marmoush ayitera nabi ntihagira ikivamo.

Mohammed Salah yaje kugira ikibazo cy'imvune, ku munota wa 45 ahita asimburwa na Mostafa Fathi.

Igice cya mbere kigiye kurangira ikipe y'igihugu ya Ghana yabonye igitego cya 1 gitsinzwe na Mohammed Kudus ku mupira yahawe na Salis Abdul Samed.

Mu gice cya kabiri n'ubundi ikipe y'igihugu ya Ghana yaje ikomerezaho ikomeza gusatira cyane ari nako Mohammed Kudus akomeza kurekura amashoti agerageza gushaka igitego cya 2.

Mu minota 57 Misiri yabaye nk'iyariye Amavubi, abakinnyi bayo nka Marmoush barekura amashoti ariko umunyezamu wa Ghana aba ibamba ayikuramo.

Ku munota wa 69 Marmoush yaje kwishyura ku mupira yari yiherewe na Inaki Williams ariko nyuma y'iminota 2 gusa Mohammed Kudus atsinda icya 2 cy'ikipe y'igihugu ya Ghana ahawe umupira na Denis Odoi.

Ikipe y'igihugu ya Misiri yabonye igitego cya 2 ku munota wa 74 gitsinzwe na Mostafa Mohammed ahawe umupira na Mahmoud Trezeguet wari winjiye mu kibuga asimbuye.

Umukino warangiye amakipe yombi anganyije ibitego 2-2. Kuri ubu muri iri tsinda B ikipe y'igihugu ya Cape Verde niyo iyiboye n'amanota 6, Misiri ni iya 2 n'amanota 2, Mozambique ni iya 3 n'inota 1 naho Ghana n'inota 1.

Mohammed Salah yagize ikibazo cy'imvune bituma ava mu kibuga hakiri kare

Mohammed Kudus yatsindiye ikipe y'igihugu ya Ghana ibitego 2 wenyine