AFCON: Senegal yisasiye Gambia, Cameroon na Algeria biranga

Ikipe y'igihugu ya Senegal, yamanutse mu kibuga idahabwa amahirwe kubera amateka yabanjirije amakipe yagiye atwara Afcon mu myaka ya vuba.

Ibyo Senegal yabyirengagije maze ku munota wa Kane Pape Gueye atsinda igitego cya mbere, ku mupira yahawe na Sadio Mane.

Senegal yari iri kurinda igikombe iheruka gutwara, yakomeje kubyitwaramo kigabo nuko iragiza igice cya mbere nta gitego irinjizwa. 

Mu gice cya Kabiri, benshi bari biteze ko Gambia iza kugombora, dore ko intsinzi ku makipe makuru zikomeje kuba iyanga. 

Senegal yari irangajwe imbere na Sadio Mane, yagumye kwataka mu gice cya Kabiri, nuko Lamine Camara ayibonera ibindi bitego bibiri ku munota wa 52 na 86. 

Umukino warangiye Senegal itsinze umukino n'ibitego bitatu ku busa bwa Gambia. Gutsinda uyu mukino, byatumye Senegal iyobora itsinda rya C, dore ko ikipe y'igihugu ya Cameroon yo yahise igwa miswi na Guinea Konakry.

Ikipe y'igihugu ya Senegal, biyoroheye yatsinze Gambia ibitego bitatu ku busa 

Umukino wahuje Cameroon na Guinea Konakry, watangiye Cameroon yamaze kumenya neza ko Senegal yatsinze umukino wayo wa mbere. Gusa ntabwo yari ifite Vincent Aboubakar uherutse kuvunikira mu myitozo.

Ikipe y'igihugu ya Cameroon kandi yakinnye umukino idafite umuzamu Andre Onana, watinze kujya mu ikipe y'igihugu kubera impamvu z'ikipe akinira ya Manchester United. Cameroon, yakinishije umuzamu wa kabiri witwa Fabrice Ondoa.

Uretse Vincent Aboubakar na Onana batari bari mu ikipe y'igihugu ya Cameroon, ubwo umutoza yahamagaraga Abakinnyi bo kuzifashisha, yakomwe mu nkokora n'imvine ya Bryan Mbeumo ukina mu kibuga hagati.

Ibyo bibazo bitandukanye, ikipe y'igihugu ya Cameroon yabimanukanye mu kibuga, nuko igwa miswi na Guinea Konakry, igitego kimwe kuri kimwe.

Guinea Konakry, niyo yabanje igitego, dore ko ku munota wa 10 gusa, Mohamed Bayo yari yamaze guhungabanya izamu rya Cameroon. Cameroon yaje kugombora igitego ku munota wa 51, gitsinzwe na Frank Magri. 

Cameroon, kunganya uyu mukino, bisa n'aho biri gushyira akadomo ku rugendo rwayo mu gikombe cya Africa dore ko imikino ikurikira itoroshye. 

Ubu Cameroon n'ubwo izaba yagaruye Andre Onana, isigaje gukina na Senegal ndetse na Gambia.Ikipe y' igihugu ya Cameroon yaguye miswi na Guinea Konakry 

Algeria yaguye miswi na Angola

Ni umukino wabereye kuri Stade de la Paix. Ikipe y'igihugu ya Algeria yari yamanukanye abakinnyi bayo bakomeye nka ba Riyad Mahrez, Baghdad Boundjah na Ismaël Bennacer.

Nk'uko bimaze kumenyerwa ku makipe akomeye, na Algeria byayinaniye kwikura mu nzara za Angola, dore ko amakipe yombi yanganyije igitego kimwe kuri kimwe.

Ikipe y'igihugu ya Algeria, niyo yafunguye amazamu ku munota wa 18, ku gitego cyatsinzwe na Baghdad Boundjah. Igice cya mbere cyarangiye Algeria ikiyoboye n'igitego kimwe ku busa bwa Angola.

Mu gice cya Kabiri, Angola yishyuye igitego ku munota wa 68, kuri Penaliti yatewe neza na Mabululu. 

Angola ikimara kwishyura igitego, Algeria yagiye gutura mu izamu rya Angola ryari ririnzwe na Adilson Neblu, birangira igitego kigumye kwanga.

Algeria yananiwe kwikura mu nzara za Angola 

Kugeza ubu mu makipe akomeye ari mu gikombe cya Africa, usibye Côte d'ivoire na Senegal, andi yaratsinzwe, andi aranganya. Amakipe akomeye atarabona amanota atatu ni Cameroon, Nigeria, Algeria, Guinea, na Misiri.

Ikipe y'igihugu ya Ghana yo ntabwo yahiriwe n'umukino wa mbere wo mu matsinda, dore ko yatsinzwe na Cape Verde.