Filime ya Bahavu 'Impanga Series' yashyizwe mu Giswahili-VIDEO

Mu kiganiro na InyaRwanda, Legend Fleury,umugabo wa Bahavu akaba ari nawe uyobora filime ze,yagarutse kuri filime Impanga Series yahinduwe mu rurimi rw'Igiswahili ikitwa “ Penzi La Mapaca” bisobanuye urukundo rw’impanga.

Ubwo yaganiraga na InyaRwanda yavuze ko bahisemo gukoresha urundi rurimi bageza ubutumwa no ku bandi bakunzi babo batumva ikinyarwanda ariko hagatekerezwa ku batuye mu bihugu bya hafi bihana imbibi n'u Rwanda  kuko bakoresha Igiswahili.

Ati “ Twashatse guhera hafi yacu kuko abatuye mu Bihugu bya East Africa benshi bumva  Igiswahili”.

Avuga ko hazajya humvikana abavuga Igiswahili ariko amashusho akagaragaza abanyarwanda bakina muri izi filime. 

Mu cyumweru gitaha harasohoka filime y'Impanga Series mu rurimi rw'Igiswahili.

Fleury yemeza adashidikanya ko bagiye gutanga ibyishimo ku bakunzi babo nk’ibisanzwe binyuze muri filime y’impanga Series, izajya ihindurwa mu giswahili ikanyuzwa kuri Channel ya YouTube  yitwa ABA Swahili.

Fleury niwe utunganya filime za Bahavu umugore we

Guhera ku rurimi rw’Igiswahili ni kimwe mu bimenyetso bigaragaza ko n’izindi ndimi ziri gutekerezwaho, mu rwego rwo kwagura filime zikinirwa mu Rwanda zikagezwa mu Bihugu bya kure nk'uko akomeza kubitangaza.

Fleury asaba abanyarwanda gukomeza gukurikira filime babategurira, ndetse bakomeza no guzisakaza kuri benshi, kuko zikubiyemo inyigisho zikenewe mu mibereho ya buri muntu.

Bahavu Jeannette umaze kugera ku bikorwa byinshi birimo gutangiza filime ze, yatangiye no gutekereza ku banyamahanga nuko bagezwaho  ibihangano bye. Nyuma y'uko mu 2020 atangije filime y’Impanga Series, yakoze n’izindi zirimo Bad Choice.

Uyu muryango wagaragaje ibikorwa bitandukanye ukakira n’ibihembo by’indashyikirwa mu mwaka wa 2023, utangiye umwaka mushya bakora ibindi bikorwa bizafasha benshi babakurikira birimo na filime nshya.

Kanda hano urebe amashusho ateguza filime y'Impanga Series mu rurimi rwa Kiswahili