Ahabanza Imikino

Real Madrid yongeye kwifuza myugariro wa Bayern Munich

Yanditswe na: ISHIMWE Walter
Taliki:10/01/2024 8:04 0

Mu mwaka w'imikino utaha, Real Madrid yagaragaje ko ishaka myugariro Alfonso Davis wa FC Bayern Munich, ufite ubwenegihugu bwa Canada.

Myugariro Alfonso Davis, afite amasezerano ya Bayern Munich azamugeza muri 2025.

Kugeza ubu Davis amaze kugaragaza ko ariwe nimero gatatu mwiza ku Isi. Muri uyu mwaka w'imikino amaze gukinira Bayern Munich imikino yose yakinnye mu gice cya mbere cya Shampiyona, ndetse yanayikiniye imikino itandatu yose yo mu matsinda ya UEFA Champions League.

Impamvu Carlo Ancelotti utoza Real Madrid ashaka kugura Alfonso Davis, ari gupanga gutandukana n'abarimo Ferland Mendy ukomoka mu Bufaransa n' umunya Espagne Fran Garcia.

Ibi Carlo Ancellotti atangiye kubipanga, nyuma y'uko ateye umugongo ikipe y'igihugu ya Brazil, akongera amasezerano yo gutoza Real Madrid kugeza muri 2026.

Carlo Ancellotti, ashaka kubaka, no kuvugurura Real Madrid, dore ko mu mwaka w'imikino ushize, Los Blankos yegukanye igikombe cya Copa Del Rey gusa.

Si Alfonso Davis wa FC Bayern Munich gusa ushakwa na Real Madrid,iyi kipe yiyita Los Blankos, ikomeje no gushaka umufaransa ukinira Paris Saint-Germain, Kylian Mbappe Lotin.

Real Madrid, ni imwe mu makipe azwiho kwitondera ikijyanye no gusinyisha abakinnyi. Mu mpeshyi ishyize yasinyishije Umwongereza Jude Bellingham, ukomeje kuyifasha kugeza ubu.

Nubwo Los Blankos yaguze Jude Bellingham mu mwaka ushyize, ni nako yanatandukanye na Karim Benzema werekeje muri Al-Itthad yo muri Arabia Saudite.

Alfonso Davis ushakishwa na Real Madrid, yageze muri Bayern Munich muri 2019 avuye muri Vancouver Whitecaps yo muri Canada.

Mu mikino 176 Alfonso Davis amaze gukinira FC Bayern Munich, amaze kuyifasha gutwara igikombe 13, birimo bitanu bya Bundesliga, na kimwe cya UEFA Champions League ya 2020.

Ku myaka 16 y'amavuko, Alfonso Davis yahamagawe mu ikipe y'igihugu ya Canada ku nshuro ya mbere. Davis amaze gukinira ikipe y'igihugu ya Canada imikino 44, yayitsindiye ibitego 15. Muri 2022 ,Alfonso Davis yagize amahirwe yo gukina igikombe cy'Isi cyabereye muri Quatar.