Amakipe arimo Arsenal, Liverpool na Bayern Munich mu ntambara ku isoko ry'igura n'igurisha ryahumuye

Ni igihe cyiza ku bakinnyi babuze umwanya wo gukina, ngo bashake amakipe bazabona umwanya. Bamwe mu bakinnyi byitezwe ko bazava mu makipe yabo ni Jadon Sancho, Àaron Ramsdale ndetse n'abandi. Newcastle United na Juventus zirifuza Kevin Philips wa Manchester City.

Ku wa 13 Ukuboza 2023, nibwo Kevin Philips yatsinze igitego cye cya mbere muri Manchester City, hari ku mikino wa UEFA Champions League, ubwo  yakinaga na Red Star Belgrade.

Kubera ko atarabona umwanya uhagije wo gukina muri Man City, uyu mukinnyi yanyuzwe no kumva hari andi makipe akunda imikinire ye. Ayo ni Newcastle United yo mu Bwongereza, na Juventus De Toure yo mu Butaliyani. 

Newcastle United na Juventus zirifuza Kevin Philips wa Manchester City 

Jadon Sancho wa Manchester United, arifuzwa na Brussia Dortmund.

Jadon Sancho siwe urose isoko ry'igura n'igurisha ryo muri Mutarama rigeze. Uyu mukinnyi ntabwo abanye neza na Eric Ten Hag utoza Manchester United, dore ko  yamaze no kwirukanwa mu ikipe ya mbere.

Jadon Sancho yanakumiwe mu bikorwa bitandukanye bya Manchester United, dore ko byageze ubwo akurwa ku rubuga rwa WhatsApp abakinnyi ba Manchester United bahuriramo.

Uyu mukinnyi yaje muri Man United avuye muri  Borussia Dortmund gusa iyi  kipe   yongeye kugaragaza ko imwifuza, dore ko ubwo yayikiniraga yari umukinnyi udasanzwe.

Nibiramuka bikunze ko Jadon Sancho ajya muri Borussia Dortmund, azaba yiyongereye kuri mugenzi we Donny Van De Beek nawe wamaze gutizwa muri Eintracht Frankfurt ikina Bundesliga aho mu Budage.

Brussia Dortmund ishaka kongera kwisubiza Jadon Sancho utamerewe neza i Manchester 

Newcastle United na Chelsea, zirifuza umuzamu wa Arsenal, Aaron Ramsdale.

Aaron Ramsdale ni umwe mu bakinnyi batishimye, nyuma yo kwamburwa umwanya wo gukina n'umunya Espagne David Raya, muri Nzeri 2023.

Ubwo Gareth Southgate utoza u Bwongereza yari amaze gusezeranya Aaron Ramsdale gushaka umwanya wo kubanza mu kibuga kugira ngo bizamuhe amahirwe yo gukina Euro, Ramsdale byahise bimushyira ku gitutu cyo gusohoka muri Arsenal.

Kuri ubu Chelsea irashaka Aaron Ramsdale nyuma y'uko yavunikishije Robert Sanchez umuzamu wa mbere. Ni nako bimeze kuri Newcastle United dore ko Nick Pope nawe yavunitse.

Chelsea na Newcastle United zirifuza Aaron Ramsdale wa Arsenal 

Arsenal irifuza Ivan Toney wa Brentford

Ku itariki 28 na 31 Ukuboza 2023, ni iminsi yeretse Mikel Arteta utoza Arsenal ko atagomba kwizerera mu busatirizi bwa Edward Nketia na Jesus Gabriel.

Ku wa 28 Ukuboza, Arsenal yatsinzwe na West Ham United ibitego bibiri ku busa kandi yari yarase amahirwe atandukanye.

Ni nako byagenze ku wa 31 Ukuboza, Fulham nayo yatsinze Arsenal ibitego bibiri kuri kimwe, byeretse umutoza ko byanze bikunze ubusatirizi afite budashobora kumuhesha igikombe.

Ivan Toney wa Brentford, amaze amezi Umunani mu bihano yahanwe ashinjwa gutega ku mikino itandukanye. Gusa uyu mukinnyi azemererwa gusubira mu kibuga ku wa 17 Mutarama 2024. 

Mu rwego rwo gukaza ubusatirizi bwa Arsenal, uwa mbere itekerezaho ni uyu Ivan Toney.

Arsenal irashaka Ivan Toney kugira ngo ikomeze ubusatirizi bwayo

Arsenal, Liverpool na Bayern Munich, zirifuza Joao Palhinha wa Fulham.

Uyu munya Portugal ukina mu Kibuga hagati muri Fulham, Joao Palhinha, Fulham iramushakamo Miliyoni 60€ kugira ngo abe yayivamo ajye gukinira amakipe atandukanye amwifuza. Ku isonga mu makipe amushaka ni Bayern Munich, Liverpool na Arsenal.

Arsenal, Liverpool na Bayern Munich mu ntambara yo gushaka Joao Palhinha 

Juventus Irashaka Thomas Partey wa Arsenal.

Umunya Ghana ukina mu Kibuga hagati muri Arsenal, Thomas Partey, arifuzwa na Juventus De Toure. Juve imushaka nk'umusimbura wa Paul Pogba wahagaritswe imyaka ine, kubera gukoresha imiti yongera imbaraga mu mubiri.

Thomas Partey ntabwo akigaragara mu kibuga kubera imvune yamukomye mu nkokora. Kuri ubu umwanya we usigaye ukinwaho na Declan Rice.

Thomas Partey w'imyaka 30 y'amavuko amaze iminsi atangiye imyitozo, dore ko imvune yatumye adahamagarwa mu ikipe y'igihugu ya Ghana. Naramuka yerekeze muri Juventus, azatangira kuyikinira ubwo Ghana izaba isezerewe mu gikombe cya Afurika.

Juventus Irashaka Thomas Partey nk'umusimbura wa Paul Pogba 

Crystal Palace, Bayern Munich na AS Roma, zirifuza Trevoh Chalobah wa Chelsea.

Chelsea yatanze amafaranga menshi mu kugura abakinnyi batandukanye. Irashaka kugira bamwe irekura, kugira ngo itazagongwa n'itegeko rya FIFA Financial Fair Play. Muri urwo rwego, ishaka gutandukana n'abarimo Trevoh Chalobah ushakwa na Palace, Bayern Munich na AS Roma.

Uyu myugaruro, ntabwo yagaragaye mu gice cya mbere cy' umwaka w'imikino wa 2023-24 kubera imvune.

AS Roma, Crystal Palace na Bayern Munich, zirifuza Trevoh Chalobah wa Chelsea 

Aston villa irashaka Emile Smith Rowe wa Arsenal.

Nyuma yo kuzongwa n'imvune, Mikel Arteta yavuze ko Umwongereza Emile Smith Rowe, ashobora kuyisohokamo. Iyo ni inkuru yasamiwe hejuru na Aston Villa isigaye iri mu makipe ahatanira igikombe, ubu iri ku mwanya wa Gatatu.

Aston Villa irashaka Emile Smith Rowe wa Arsenal 

Real Madrid na Bayern Munich zirashaka Raphael Varane wa Manchester United.

Nyuma y'uko mu minsi mike Manchester United izagarura abakinnyi bari mu mvune nka Lisandro Martinez na Harry Maguire, ibi biri guhurirana n'uko Varane ari gusoza amasezerano muri Manchester United.

Uyu mukinnyi ntabwo akozwa ibyo kongera amasezerano, dore ko yifuzwa Real Madrid yamenyekanyemo, ndetse na Bayern Munich yo mu Budage.

Raphael Varane udakozwa ibyo kongera amasezerano muri Manchester United, arifuzwa na Bayern Munich na Real Madrid