Nta muraperi wundi urabikora! Eminem yaciye agahigo kuri YouTube

Marshall Mathers II umuraperi ukomeye ku rwego mpuzamahanga wamamaye ku izina rya Eminem, yongeye guca agahigo ku rubuga rwa YouTube. Uyu muraperi wakunzwe mu ndirimbo nka 'Rap God', 'Not Afraid', 'Love The Way You Lie' n'izindi atangiye umwaka wa 2024 ariwe uri imbere y'abandi baraperi.

Eminem yarangije umwaka wa 2023 ariwe muraperi wa mbere ku Isi ufite abantu benshi barembye ibihangano bye kuri YouTube bangana na Miliyari 28.5. 

YouTube yagaragaje ko muri Mutarama ya 2023 Eminem yarafite abantu barebye indirimbo ze bangana na Miliyari 25, bivuze ko mu 2023 yarebwe n'abantu Miliyari 3.5 bigatuma yuzuza miliyari 28.5 zabamaze kureba ibihangano bye kugeza ubu.

Eminem niwe muraperi uyoboye abandi ku rubuga rwa YouTube

Uyu muraperi umaze imyaka irenga 30 mu muziki ndetse akaba ari ku mwanya wa 6 mu baraperi 50 b'ibihe byose, yanaciye agahigo ko kuba umuraperi wa mbere ku isi ukurikirwa n'abantu benshi kuri YouTube (Subscribers), bangana na miliyoni 58.5. Niwe muraperi winjiye mu 2024 akurikirwa cyane kuri uru rubuga rumaze imyaka isaga 19 rushinzwe.

Uretse kuba Eminem ariwe muraperi uri ku gasongero ka YouTube, yanaje ku rutonde rw'abahanzi binjiye muri 2024 bahagaze neza kuri YouTube, barimo Tayloy Swift, Ed Sheeran, Mariah Carey n'abandi bafite ibihangano byinjiza abantu mu mwaka mushya biri kurebwa cyane.

Eminem amaze kugira abantu miliyari 28.5 barebye ibihangano bye kuri YouTube mu 2023, mu gihe yujuje miliyoni 58 z'abamukurikira kuri uru rubuga