Munyakazi Sadate yatanze impanuro, Rwatubyaye aratungurana! Abanyamupira ntibatanzwe mu bukwe bwa The Ben

N'iyo waba udakunda imyidagaduro ariko ukaba ufite telefone yawe cyangwa mudasobwa ifite interineti, kuri uyu wa Gatanu mu masaha ya nimugoroba ntabwo wari kuyoberwa ko Mugisha Benjamin [The Ben] yasabye akanakwa Uwicyeza Pamella.

Ku mbuga nkoranyambaga zitandukanye cyane cyane iz'ibinyamakuru birimo na InyaRwanda.com nta kindi kintu cyacicikanaga kitari amashusho ndetse n'amafoto byo muri ubu bukwe.

Bwitabiriwe n'abantu batandunye bazwi biganjemo abafite aho bahuriye n'Imyidagaduro ariko n'abafite aho bahuriye n'umupira w'amaguru mu Rwanda ntabwo batanzwe. 

Uwa mbere ni Munyakazi Sadate wamenyekanye cyane ayobora ikipe ya Rayon Sports. 

Uyu mugabo ku munsi yagiye gushyigikira The Ben na Pamella ndetse aganira na InyaRwanda yabageneye impanuro avuga ko mu rugo rwabo bagomba kuzashyira imbere koroherana no kumvikana.

Yagize ati "Mu rugo rushya, ni ukoroherana, ni ukubana, ni ukubaka urukundo neza, bakubaka ibyiza byose bishoboka kugira ngo urugo rwabo ruzagende neza.”

Usibye Munyakazi Sadate kandi hari na myugariro w'ikipe y'igihugu y'u Rwanda "Amavubi" na Rayon Sports, Rwatubyaye Abdul. 

Uyu mukinnyi mu ikote ry'ubururu bwerurutse yitabiriye ubu bukwe mu gihe imikino ibanza ya shampiyona y'icyiciro cya mbere mu Rwanda yarangiye, bakaba bari mu kirihuko cy'iminsi mikuru aho imikino yo kwishyura izakinwa guhera mu kwezi kwa mbere k'umwaka utaha.

Rwatubyaye Abdul kandi ni umwe mu bakinnyi b'umupira w'amaguru mu Rwanda bafitanye umubano n'ibindi byamamare byo mu myidagaduro.

Undi mukinnyi wagaragaye muri ubu bukwe yabukereye mu ikoti ry'umutuku ni Biramahire Abeddy.

Uyu mukinnyi kuri ubu akinira ikipe ya UD Songo yo muri Mozambique. Mu Rwanda yakiniye amakipe arimo Mukura VS, Bugesera FC, AS Kigali na Police FC.

Rwatubyaye Abdul na Biramahire Abeddy ni bamwe mu bitabiriye ubukwe bwa The Ben na Pamella

Munyakazi Sadate wabaye Perezida wa Rayon Sports nawe yitabiriye ubukwe bwa The Ben na Pamella

The Ben yasabye anakwa Uwicyeza Pamella