Harry Kane na Jude Bellingham bakomeje kunyurwa n'intangiriro nziza mu makipe mashya

1. Jude Bellingham

Kuva Jude Bellingham yagera muri Real Madrid, benshi batangiye kuvuga ko azibagiza abafana Zinedine Zidane. Ni nyuma y'uko yaguriwe kujya akina mu kibuga hagati, ibyo akabirengaho akaba anatsinda ibitego byinshi.

Real Madrid ntabwo yicuza kuba yaratanze akayabo ka miliyoni 88€ muri Brussia Dortmund igura uyu mukinnyi. Si buri mukinnyi ukina mu kibuga hagati ushobora gutsinda nka Jude Bellingham.

Kugeza ubu Jude Bellingham amaze gutsindira Real Madrid ibitego 13. Ibyo ntabwo wabibaza abataka nka Anthony Martial na Rasmus Hojuland ba Manchester United.

Bellingham uri kugira intangiriro zidasanzwe muri Real Madrid, ibikomeye yabikoze ubwo yakuraga Los Blankos mu menyo ya FC Barcelona ayitsinda ibitego bitatu.

2. Harry Kane

Mu mpeshyi nibwo Harry Kane yafashe umwanzuro wo kuva muri Tottenham Hotspurs yakuriyemo akerekeza i Bavaria muri Bayern Munich.

Kimwe mu byamukuye muri Tottenham ni uko ari muri ba Rutahizamu beza babayeho muri English Premier League, ariko akaba nta gikombe na kimwe afite.

Kuva Harry Kane yagera i Bavaria, akomeje gufasha Bayern Munich kugeza ubwo abafana basigaye baririmba izina rye kuri Allianz Arena.

Mu gihe shampiyona ya Bundesliga itaragera muri kimwe cya Kabiri, Harry Kane amaze kugira uruhare mu bitego 17. Ni nyuma y'uko amaze gutsinda ibitego 12 akaba amaze gutanga imipira itanu yavuyemo ibitego.

Harry Kane Kandi mu mwaka we wa mbere muri Bayern Munich akomeje kuyifasha kwitwara neza mu mikino ya UEFA Champions League.

Uko Harry Kane na Jude Bellingham bakomeje guhirwa n'intangiriro nziza mu makipe yabo mashya, siko bimeze kuri Rasmus Hojuland wa Manchester United, Moises Caisedo wa Chelsea, Kai Havertez wa Arsenal, Mason Mount wa Manchester United ndetse n'abandi.

Hari bamwe mu bakinnyi batagize intangiriro nziza mu makipe yabo mashya, ariko uko umunsi yicuma bakaba batanga icyizere. Abo ni Andre Onana wa Manchester United, Dominik Szoboszlai wa Liverpool, David Raya wa Arsenal ndetse n'abandi.

Isoko ry'igura n'igirisha rizafungura mu kwezi kwa Mbere. Amakipe azongera imbaraga aho abona afite Imbaraga nkeya.

Abongereza babiri Jude Bellingham na Harry Kane bakomeje kubica bigacika mu makipe mashya. Kane yagiye muri Bayern Munich avuye Muri Tottenham Hotspurs naho Jude Bellingham ajya Muri Real Madrid avuye muri Brussia Dortmund 

Rutahizamu wa Manchester United Rasmus Hojuland ni umwe mu bakinnyi batarahirwa mu makipe mashya bakinira

Dominic Szoboszlai uko iminsi yicuma aba mwiza muri Liverpool