Eric Ndagijimana ushinjwa kwiba Telefone ya The Ben yatangiye kuburana

Eric Ndagijimana ukurikiranyweho icyaha cyo kwiba telefone ya The Ben yitabye urukiko rw'ibanze rwa Nyarugenge aburana ku cyaha cyo kwiba nk'uko kuri dosiye ye byari byanditseho.

Ni icyaha yaburanye ahakana dore ko atigeze afatanwa iriya telefoni. Eric Ndagijimana uzwi nka X-Dealer yatawe muri yombi avuye i Burundi mu mujyi wa Bujumbura.

Ni igitaramo cyabaye tariki 30 Nzeri 2023 kuri Eden Garden Resort ikora ku kiyaga cya Tanganyika cyarimo abafite amafaranga bitewe n'uko imeza y'abantu 8 kuyishyura byasabaga miliyoni 10 Fbu.

Itike y'amafaranga make yari 100,000 Fbu, cyajemo ibibazo byo kubura telefone ya The Ben dore ko Polisi y'u Burundi yamaze amasaha 2 isaka ahabereye kiriya gitaramo birangira telefone ibuze.

Amakuru yatanzwe na Timeless Vevo uzwi nka Pilato ukina Filimi yabwiye InyaRwanda ko umugambi wo kwiba telefoni watunganyijwe na Coach Gael akaba yari yabwiye Eric Ndagijimana ko hari Miliyoni 5 Frw. Timeless Vevo yabwiye Dealer ko ayo mafaranga ari make nibura iyo bagira miliyoni 50 Frw. Akomeza avuga ko Coach Gael yashakaga iriya telefone cyane.

Umucamanza yavuze ko umwanzuro w'urubanza ku ifungwa n'ifungurwa ry'agateganyo uzasomwa ku itariki 23 Ukwakira 2023 saa saba ku Rukiko rw'ibanze rwa Nyarugenge.

Hari amakuru avuga ko The Ben yasabye ko Telefone yayihabwa bityo bakareka Eric Ndagijimana ntakomeze gufungwa. Icyakora kugeza ubu Eric Ndagijimana ahakana ko yibye iriya telefone.

Icyaha akurikiranweho cyo kwiba aramutse agihamijwe yahabwa igifungo cy'imyaka iri hagati 3-5 muri gereza ariko habayeho kunaniza urukiko (inkomezacyaha) imyaka yakwiyongera. 

The Ben aherutse kubwira Radio Rwanda ko ibitaramo bibiri yakoreye mu Burundi byagenze neza nk’uko yabisengeye, kandi avuga ko byamwibukije byinshi.

Yavuze ati “Uko nagisengeye niko cyagenze. Ikintu nishimira gikomeye cyanze no kumvamo ni uburyo Abarundi n’Abanyarwanda bavuye hano bakaza kunshyigikira, twahinduye n’aho cyari kubera baraza. Numva ngo ni ubwa mbere hinjiye abantu benshi mu gihe gito ku mipaka bavuye inaha.”

Akomeza ati “Byanyibukije ko mfite byinshi mbagomba kuko abantu iyo baguha urukundo uba wumva ucishijwe bugufi cyane no kuba udafite byinshi ugomba kubaha, bihwanye n’umutima bakweretse.”

Yavuze ko ibi bitaramo byamusigiye umukoro wo kuticisha irungu abakunzi be. Ati “Wibuke ko maze igihe kinini ntasohora indirimbo, byatumye numva ko ngomba gusohora indirimbo nkaha abantu ibintu byabo, ngomba kubaha indirimbo.”

The Ben aherutse kuvuga ko atarabona telefoni ye ariko ko 'signal' yayo yagaragaje ko iri mu Rwanda, kandi ko RIB ikomeje iperereza