Ariana Grande yishyuye arenga Miliyari Dalton Gomez bahanye gatanya

Hashize amezi abiri bimenyekanye ko Ariana Grande yatandukanye na Dalton Gomez wari umugabo we ndetse ko yamaze kwaka gatanya. Ibi ariko byamenyekanye nyuma yaho hari hashize iminsi bivugwa ko iby'urukundo rwabo byarangiye mu mpera z'umwaka wa 2022 ndetse ko kuva muri Mutarama uyu mwaka batari bakibana mu nzu imwe.

Kuri ubu gatanya yabo yamaze gusinywa ndetse Ariana Grande yabaye ingaragu byemewe n'amategeko kimwe na Dalton Gomez. TMZ yatangaje ko nubwo aba bombi batari baravanze umutungo bitabujije uyu muhanzikazi kugira amafaranga menshi amwishyura nk'uko amategeko ya gatanya muri Amerika abiteganya.

Ariana Grande yasubiye kuba ingaragu nyuma yo gusinya gatanya na Dalton 

Ariana Grande icyamamarekazi mu njyana ya Pop, yahaye Miliyoni imwe y'Amadolari Dalton Gomez nyuma yo gusinya gatanya yabo. Aya mafaranga arenga Miliyari uyashyize mu mafaranga y'amanyarwanda. Si ayo gusa yamuhaye kuko yanishyuye agera kuri $25,000 abanyamategeko bari bahagarariye Dalton Gomez.

TMZ ikomeza ivuga ko kuba Ariana Grande ariwe wishyuye aya mafaranga ari uko ariwe usanzwe ufite amafaranga menshi kurusha Dalton Gomez kandi ko iyo aba ari Dalton Gomez ukize cyane niwe wari kuyishyura.

Ariana Grande yishyuye arenga Miliyari Dalton Gomez batandukanye byemewe n'amategeko

Ibya Ariana Grande w'imyaka 30 na Dalton Gomez w'imyaka 27 bishyizweho akadomo nyuma y'imyaka 2 bari bamaze barushinze nyuma yo gukundana umwaka umwe gusa. Ibi ariko byunguye cyane Dalton Gomez kuko atandukanye n'uyu muhanzikazi amukuyeho amafaranga atari macye.