Imvano yo kuba Ambassadors of Christ yakusanije inkunga yo kubaka urusengero "Umubyeyi Remera"

Isano n’amateka biri hagati ya korari Ambassadors of Christ n'Umubyeyi Remera, byagarutsweho mu gitaramo cyo gukusanya inkunga yo kubaka urusengero rwa Remera, hakorwa igitaramo kitazibagirana mu mitima ya benshi.

Igitaramo "Umubyeyi Remera Concert" cyabereye muri Camp Kigali kuwa 17 Nzeri 2023, kitabiriwe n’amakorali akunzwe mu itorero ry’abadiventiste b’umunsi wa karindwi harimo korari Umusamariya mwiza, Way of hope, Ambassadors junior, ndetse na Ambassadors of Christ yateguye iki gitaramo.

Umunyamuryango wa Ambassadors of Christ ubwo yagarukaga ku mateka ari hagati yabo n’itorero, yakomoje ku byashingiweho hashingwa iyi korari ndetse n’isano riri hagati yabo.

Yavuze ko Ambassadors of Christ yashinzwe nyuma ya Jenoside yakorewe Abatutsi mu 1994, hagamijwe komora benshi ibikomere no kugarura icyizere cya benshi cyari kimaze gutakara kubera agahinda ko kubura ababo.

Iyi korari yashinzwe ku mpamvu zo gutanga ihumure ku bantu, bamenyeshwa ko Imana ikibakunda kandi itigeze iva mu ruhande rwabo, yiyemeza gukorera umurimo w’Imana mu itorero rya Remera, nayo ibabera umubyeyi irabakuza.

Batangaje ko izina “Umubyeyi Remera” risobanuye byinshi kuri bo, harimo no kwishimira uburere ryabahaye, no gukunda Imana bakomoye muri iri torero kuva ari bato kugeza bakuze.

Isano riri hagati y’Umubyeyi Remera na Ambassadors of Christ, rishingiye ku burere bwatanzwe n'itorero ku bizera yari ifite harimo n'iyi korari, ikaba umubyeyi wa benshi.

Amateka atangaje, ni uko iyi korari yagukiye muri iri torero bagafatanya mu bihe bigoye bubaka umurimo w’Imana, bakagarura benshi kuri Kristo.

Mu buhamya bwagarutsweho na benshi, batangaje ko iri torero ryafashije benshi mu buryo bunyuranye harimo gukuza bamwe mu buryo bw’umwuka, gushyingira bamwe bakubaka, n’ibindi.

Iki gitaramo cyakurikiwe n’abatari bacye yaba abitabiriye n'abakoreshaga murandasi, kandi bitanga uko bashoboye mu  gukusanya inkunga izubaka urusengero rwa Remera SDA Church.

Nyuma yo kuvuga ibigwi byaranze umubyeyi remera, gushimira abagize uruhare mu iterambere ryayo, ndetse n'abayobozi babanye nayo bakayitiza amaboko, habaye kuramya no guhimbaza Imana, binyuze mu ndirimbo zakunzwe mu myaka ya kera n'ubu.

Amateka yabo n'Umubyeyi Remera ntazasibangana mu mitima yabo