Rayvanny yaje i Kigali kwimara agahinda - AMAFOTO

Ku gicamunsi cyo kuri uyu wa Mbere tariki 21 Kanama 2023, uyu muhanzi yasohoye amafoto atatu amugaragaza ari kumwe n’abo bakorana mu muziki. Avuga ko ari i Kigali mu Rwanda.

InyaRwanda yabonye amakuru avuga ko uyu muhanzi wamamaye mu ndirimbo zirimo ‘Tetema’ yaraye muri Elizabeth Apartment i Nyarutarama mbere y’uko mu gitondo cyo kuri uyu wa Kabiri tariki 22 Kanama 2023 afata indege imwerekeza muri Tanzania.

Si ubwa mbere Rayvanny ageze i Kigali, kuko mu 2019 yahakandagiye agenzwa n’umushinga w’indirimbo yari afitanye na Meddy.

Mu butumwa yanyujije kuri Instagram, yashinje abamutumiye muri Congo kugira uruhare mu migendekere mibi y’igitaramo yagombaga gukorera abafana b’umuziki we.

Avuga ko batabashije kumusanga kuri hotel ngo baganire birambuye kuri iki gitaramo mbere y’uko ajya aho yagombaga gutaramira.

Amashusho amugaragaza ari kuririmbira abantu batishimye ahanini biturutse ku kuba yatinze kubataramira. Hagaragara kandi bamwe bamusanga ku rubyiniro.

Uyu munyamuziki yavuze ko ntacyo umutima umushinja, kuko yari yiteguye mu mbaraga ze zose gutanga ibyishimo, ariko abamutumiye ntibamufasha.

Yavuze ko ari amahirwe atakaje kuba atabashije gutaramira neza abakunzi be nk’uko yabyifuzaga.

Bamwe mu batanze ibitekerezo bifatanyije nawe mu kababaro, abandi bavuga ko nawe yagize uruhare mu byatumye igitaramo cye muri Goma kitagenda neza.

Diamond nawe yatangaje ko yasubitse igitaramo yagombaga gukorera muri Berlin mu iserukiramuco Afro Fest kubera abamutumiye batubaharije ibyo bavuganye.

Yiseguye ku bakunzi be, ariko avuga ko akomeje ibiganiro n’abari bamutumiye. 

Rayvanny ni umuhanzi, w’umwanditsi w’indirimbo wanyuze mu inzu ifasha abahanzi mu bya muzika ya WCB Wasafi Record ya Diamond.

Uyu musore yavukiye kandi akurira mu gace ka Nzovwe mu Mujyi wa Mbeya. Ni umwe mu bagezweho kandi bakunzwe mu njyana ya Bongo Flava.

Mu 2021 yafunguye inzu y’umuziki yise ‘Next Level Music’, kandi azwi cyane mu ndirimbo zirimo ‘Kwetu’ yaharuye inzira y’umuziki we. 

Ibi byatumye mu 2022 atangaza ko yavuye muri WCB kugirango yite kuri ‘Label’ ye. 

Rayvanny yatangaje ko ari i Kigali, ni nyuma yo gutenguhwa n'abamutumiye muri Congo

Rayvanny yaciye i Gisenyi mbere y'uko agera i Kigali aho yacumbitse 

Rayvanny yaherukaga i Kigali muri 2019 akorana indirimbo na Meddy

KANDA HANO UREBE AMASHUSHO Y'INDIRIMBO 'TETEMA' YA RAYVANNY NA DIAMOND

">