Nyuma yo gutaramana na Josh Ishimwe, Aline Gahongayire yatumiwe mu iserukiramuco i Dubai

Ni ubwa mbere iri serukiramuco rigiye kubera muri uyu Mujyi w’akataraboneka. Rizaba ku wa 29 Kanama 2023 kugeza ku wa 2 Nzeri 2023.

Ryatumiwemo Christine Shushu wo muri Tanzania, Jimmy D Psalmis wo muri Nigeria, Mike Flor wo muri Repubulika Iharanira Demokarasi ya Congo (RDC), Mercy Masika wo muri Kenya, Aline Gahongayire wo mu Rwanda, Takie Ndou wo muri Afurika y'Epfo, Jocktant wo mu Bufaransa, Chorale Internationale yo muri RDC n’abandi.

Iri serukiramuco ryanatumiye abakozi b'Imana bakomeye barimo Prohete Neema Sikatenda wo muri RDC Congo, Bishop Brundio Nkwim wo mu Mujyi wa Paris, Iri serukiramuco rya 'Gospel' rizaba umwanya mwiza wo guhura kw'abantu bakora ubushabitsi mu ngeri zinyuranye, guhura kw'imiryango inyuranye, gutemberera mu bice bitandukanye nyaburanga by'uyu mujyi n'ibindi.

Gahongayire yabwiye InyaRwanda ko abantu baguze amatike yo kwinjira muri iri serukiramuco bazafashwa gucumbika muri Hoteli z'inyenyeri eshanu, kandi bazafashwa gutemberezwa ahantu hanyuranye.

Ati "Birenze kwitabira iri serukiramuco, kuko tuzaganirizwa ijambo ry'Imana, dutemberere ahantu hanyuranye, haganirwe ku bucuruzi, ubukerarugendo n'ibindi."

Prohete Neema Sikatenda wateguye iri serukiramuco ni umwe mu banyamafaranga bo muri Afurika batunze za Miliyari z'amadorali, umuhanuzi n'umwugisha w'Ijambo ry'Imana mu nsengero zitandukanye zo muri Afurika.

Uyu mugabo asanzwe afite amazu menshi mu Mujyi wa Dubai, kandi afite Impamyabumenyi ya Kaminuza mu gutegura amaserukiramuco.

Gahongayire atangajwe kuririmba muri iri serukiramuco "Neema Festival" nyuma yo gususurutsa abitabiriye ibirori byo kwizihiza imyaka 50 ya Hôtel des Mille Collines, yifashishijemo umuhanzi w’indirimbo ziha ikuzo Imana, Josh Ishimwe, byabaye ku Cyumweru tariki 6 Kanama 2023.

Gahongayire yari we muhanzi Mukuru muri ibi birori byihariye byitabiriwe n’abantu banyuranye bo mu bihugu bitandukanye byo ku Isi. 

Muri iki gitaramo, Josh Ishimwe yaboneyeho n’umwanya wo gutumira abakunzi be mu gitaramo yise ‘Ibisingizo’ azakora ku wa 20 Kanama 2023.

Ni igitaramo kizabera muri Camp Kigali, kandi azagihuriramo na Chorale Christus Regnat ndetse na Alarm Ministries. Ni ni 5,000 Frw, 10,000 Frw, 15,000 Frw muri VIP ndetse na 20,000 Frw muri VVIP. Ameza (table) y'abantu 5 ni 250,000 Frw. Ushobora kugura itike unyuze kuri: *182*8*1*604473#

Ni ubwa mbere Josh Ishimwe wamamaye mu ndirimbo nka ‘Yezu wanjye’ yasubiyemo, agiye gukora igitaramo cye bwite nyuma y’imyaka ibiri ishize ari mu muziki afasha abantu kwegerana n’Imana binyuze mu bihangano bifasha benshi.

Yinjiye mu muziki afite umwihariko! Kuko akora umuziki wa ‘Gospel’ ivanze na gakondo nyarwanda biri mu byatumye mu gihe cy’imyaka ibiri ishize yarakunzwe.

Josh Ishimwe avuga ko mu mwaka wa 2000 ari bwo yatangiye urugendo rwo gukorera Imana binyuze mu kuririmba muri korali y’abana mu rusengero. Ariko icyo gihe ntiyari aziko ari umwuga ushobora kuzamubeshaho mu buzima bwe bwose.

Uyu musore w’imyaka 23 y’amavuko yanyuze mu matsinda atandukanye y’abaramyi ari nako akuza impano ye yatangiye kugaragaza kuva mu myaka ibiri ishize.

Gahongayire yatumiwe mu iserukiramuco rigiye kubera bwa mbere mu Mujyi wa Dubai

Gahongayire yahuriye na Josh Ishimwe mu gitaramo cyo kwizihiza imyaka 50 ya Hôtel des Mille Collines

 Josh Ishimwe ari kwitegura gukora igitaramo gikomeye ku wa 20 Kanama 2023

 Aline Gahongayire ari kwitegura gushyira hanze indirimbo ye yise ‘Zahabu’ 

Umuhanzi akaba n’umwanditsi w’indirimbo, Rugamba yafashije Gahongayire muri iki gitaramo 

Josh Ishimwe yaboneyeho gutumira abakunzi be mu gitaramo azakora ku wa 20 Kanama 2023

KANDA HANO UREBE AMASHUSHO Y’INDIRIMBO ‘RENDEZ- VOUS’ YA GAHONGAYIRE

">