Christy wateye umugongo indirimbo z'urukundo yiyambaje Rugira mu ndirimbo nshya “Nkore iki?”-VIDEO

Umuhanzikazi Mutoni Christine uzwi ku izina rya Christy, mu ndirimbo ye nshya “Nkore iki?” agaruka ku buzima bubi umwizera ahura nabwo, bukamujyana kure y’Imana, ariko yibutsa abantu ko gutabarwa kwabo guherereye ku Mana.

Umuramyi, umuririmbyi w’indirimbo zisingiza Imana, Christy, yavuze ko benshi bahura n’ibigeragezo, bakabona nta nzira, nta muvandimwe ubikoza ndetse ibibaca intege bikisukiranya, ntibibuke kuganyira Imana, nyamara ari yo yonyine ifite imbaraga mu biganza byayo.

Ati “Mu buzima bwuzuye ingorane n'ibigeragezo aho umuntu abona ibibazo bimugose, abona nta nzira y'ubutabazi bw'ibibazo arimo, nta nshuti, nta muvandimwe watabara. 

Ndetse ibicantege ari byinci, umubabaro ari mwinshi ugacika intege zo gusenga, ugata kwizera kose ukumva ko nta butabazi buhari, nyuma y'ibyo byose ugashaka kwicira inzira aho zitari, ariko burya muri ibyo bibazo byose haba hari Imana ishobora byose ifite imbaraga”.

Yakomeje avuga ko Imana ihora yiteguye kugenera abana bayo ibyiza bibakwiriye mu buzima bwabo bwa buri munsi, abibutsa ko ari inshingano zabo kuyizera, kuyihanga amaso no gukora ibyo gukiranuka, Imana nayo igatabara mu gihe gikwiriye bakongera kunezerwa.

Christy ubarizwa mu Itorero rya Anglican (EAR), yavuze ko umwuka w’ubuhanzi wamujemo kera, atangira aririmba indirimbo zigaruka ku rukundo, ariko aza guhindura yinjira mu ndirimbo zihimbaza Imana, ndetse ahitamo kuvuga ubutumwa bwiza no kumenyesha benshi iby’agakiza kayo.

Yatangaje ko ariyo ndirimbo ya mbere ashyize hanze, ikaba ivuga ku bumana no mirimo yayo. Yasabye abantu gukurikira ubutumwa burimo kuko buzabafasha kurenga imibabaro batewe n’Isi yuzuye ibibazo byinshi, bakiyegurira Imana, ikababera umutabazi.

Umuramyi Christy avuga ko atazigera ahwema gushima urukundo agaragarizwa n’abantu bakurikira ibihangano bye, kandi ko bimuha imbaraga zo gukora cyane biruseho.

 Mutoni Christine uzi gucuranga Guitar yashyize hanze indirimbo "Nkore iki?"

Umuramyi Christy yibukije abantu kwegera Imana, bakirengagiza ibibababaza

Yishimiye kuririmbira Imana akavuga kugira neza kwayo benshi bakamenya ineza yayo

">