Bushali arataramira abitabira imikino ya B&B International Football Drafting League

Nyuma y'iminsi itari mike y'imyiteguro, amakipe agera kuri ane, aramanuka mu kibuga kuri uyu wa Kane, hakinwa umunsi wa mbere. Ni irushanwa rizamara iminsi 3 aho umunsi wa nyuma uzakinwa kuri wa Gatandatu tariki 15 Nyakanga 2023, ku munsi hakazajya hakinwa imikino ibiri yose ikazeba kuri Kigali Pele Stadium.

Irushanwa ryateguwe mu rwego rwo gufasha abakinnyi badafite amakipe bavuye mu bice bitandukanye by'Isi, ririmo abakinnyi basaga 60 bigabanyije mu makipe ane agomba guhura hagati yayo ubundi hakabaho gutoranywa.

Amakipe ane agomba gukina, harimo Team Skol izaba itozwa na  Kayiranga Baptiste, hakaba Team RNIT itozwa na Gatera Moussa, Team Liberation itozwa na Hitimana Thierry na Team Ndoli Safari izaba itozwa na Alain Kirasa.

Abakinnyi bamaze igihe bageze mu Rwanda aho bamaze iminsi igera kuri itatu bari mu myitozo 

Kuri uyu wa Kane, umukino wa mbere uratangira ku isaha ya Saa 17:00 PM aho ikipe ya RNIT FC icakirana na Liberation FC. Kuva ku isaha ya saa 19:30 PM hakurikiraho umukino wa kabiri, uza guhuza ikipe ya SKOL FC yakira Ndoli Safaris. Umukino wa mbere urasifurwa na Umutoni Alice uza kuba ari umusifuzi wo hagati, wungirijwe na Umutesi Alice, Murangwa Usanga, Ugirashebuja Ibrahim, na Tuyishime Angelique. Umukino wa kabiri urayoborwa na Rurisa Patience uza kungirizwa na Ishimwe Didier Safali Hamissi, Ngabonziza Jean Paul na Kamanzi Emery.

Ntabwo ari imikino gusa kuko abantu bari bwitabira kuri uyu wa Kane baza gutaramirwa n'abanzi barimo Bushali, Papa Cyangwe, DJ Brianne, DJ Fabulous na DJ Emmy. Kwinjira kuri iyi mikino n'amafaranga 1000 ahasigaye hose, ibihumbi 2000 mu mbavu za sitade, n'ibihumbi 5000 mu myanya y'icyubahiro.

Ntabwo ari imikino gusa n'abakunzi b'umuziki bazirikanwe