Abakinnyi 2 ba APR FC basinyiye ikipe yo muri Oman

Nk'uko tubikesha imbuga nkoranyambaga z'iyi kipe, abakinnyi babiri bakinira ikipe ya APR FC aribo Nshuti Innocent ndetse na Mugisha Gilbert bamaze guhabwa ikaze ndetse no kumvikana buri kimwe n'iyi kipe.

Aba bakinnyi  ni bamwe mu bo  APR FC yagendeyeho mu mwaka ushize w'imikino, aho bagiye bayitsindira ibitego bitandukanye byatumye ibasha kwegukana igikombe cya Shampiyona.

Ntabwo ari muri APR FC gusa, kuko aba bombi bakoreshejwe byimbitse mu mikino Amavubi aheruka gukina, harimo umukino u Rwanda rwanganyijemo na Benin muri Benin igitego kimwe kuri kimwe, igitego cy'u Rwanda kikaba cyaratsinzwe na Mugisha Gilbert. Mu mukino uheruka kubera i Huye u Rwanda rwakira Mozambique Nshuti Innocent niwe wari wabanje imbere ashakira ibitego u Rwanda.

Nshuti Innocent ni ubwa kabiri agiye gukina hanze y'u Rwanda 

Al-Nahda Club ikina icyiciro cya mbere muri Oman, ikaba ari nayo ifite igikombe cya Shampiyona giheruka 2022-23. Iyi kipe izwi ku izina na Al-Aneed yashinzwe mu 2000 ikaba yambara umweru n'icyatsi nk'uko Kiyovu Sports yambara neza neza.

Nshuti Innocent na Mugisha Gilbert bari mu bakinnyi bivuga ko APR FC yari gusigarana mu bakinnyi b'abanyarwanda, nyuma yaho ifatiye umwanzuro wo gusinyisha abakinnyi b'abanyamahanga. 

Mugisha kuva yagera mu ikipe ya APR FC, yagize ibihe byiza n'ubwo atakundaga kubanza mu kibuga 

Al-Nahda FC yerekanye Nshuti Innocent nk'umukinnyi wayo mushya 

Mugisha Gilbert nawe umwaka utaha ntabwo azakina mu Rwanda