Yatambukije ubutumwa bwa benshi! Minisitiri Utumatwishima yunamiye Pasiteri Théogène

Inkuru y’incamugongo y’urupfu rwa Pasiteri Théogène Niyonshuti yasakaye mu rukererera rwo kuri uyu wa Gatanu tariki 23 Kamena 2023. Yishwe n’impanuka yabaye ubwo yari avuye mu gihugu cya Uganda mu rugendo rw’ivugabutumwa no kwakira abashyitsi.

Ni umwe mu bagabo bahagaze ku ijambo ry’Imana, kandi bagaragaza batizigamye inzira y’urugendo rubishye banyuzemo, nyuma Imana ikabagirira neza bakira agakiza.

Amashusho ye agirana ibiganiro n’ibitangazamakuru binyuranye, yagiye akwirakwira ku mbuga nkoranyambaga, cyane cyane ashingiye ku nyigisho z’ubuzima abantu banyuramo, ibihe by’umuryango we, imibanire, guhanura urubyiruko n’ibindi.

Minisitiri Utumatwishima yanditse kuri konti ya Twitter, avuga ko mu nzira y’ubuzima bwa Pasiteri Théogène Niyonshuti yatambukije ‘ubutumwa bwa benshi muri twe' mu buryo 'twese tutabasha kubikora.’.

Yavuze ko uyu mugabo wari Umukristu wa ADEPR yasomaga ibyanditswe ‘mu buryo bworohera abato kubwumva’.

Yasabye Imana gukomeza umuryango wa Pasiteri Théogène Niyonshuti, abo basenganaga, urubyiruko n’abandi bose ‘ubutumwa bwe bwafashije’.

Umushumba Mukuru wa ADEPR, Pasiteri Ndayizeye Isaïe yabwiye InyaRwanda ko bababajwe n’inkuru y’urupfu rwa Pasiteri Théogène. Ati "Byatubabaje cyane, ni inkuru twumvise kuva saa munani z'ijoro".

Yavuze ko kubura Pasiteri Théogène mu Itorero ari igihombo kitavugwa. Ati "Yari afite umumaro munini cyane mu itorero no hanze".

Ukoresha izina rya Monalisa kuri Twitter yunamiye Pasiteri Théogène yisunze ijambo yigeze kuvuga rigira riti “Nubona nta mafaranga ufite, ukabona nta na 'stress' ufite nshuti yanjye n’ubwenge ntabwo uzaba ufite.”

Umuyobozi ushinzwe Imiturire n'Ibikorwaremezo mu Mujyi wa Kigali, Dr Mpabwanamaguru Merard, yanditse kuri Twitter agira ati “Umutima wanjye urababaye! Muvandimwe Imana ikwakire!

Pasiteri Théogène yitabye Imana aguye mu mpanuka yabereye i Kabare muri Uganda