Karim Benzema, rutahizamu w'ikipe y'igihugu y'u Bufaransa, yamaze imyaka irenga 14 mu ikipe ya Real Madrid. Nyuma y'igenda rya Cristiano Ronaldo, niwe wari ku ruhembe rwo gutsinda ibitego muri Real Madrid. Mbere yo kuyivamo, yabanje gutwara Balon d'Or ndetse anakuraho tumwe mu duhigo twa CR7.
Umukino wa nyuma Benzema yakinnye muri Real Madrid yaciye agahigo ko kuba ariwe mukinnyi watsinze ikipe ya Athletic Bilbao ibitego byinshi mu mateka ya LaLiga Santander.
Ibi Karim Benzema yabikoze kuri iki cyumweru ubwo ikipe ya Athletic Bilbao yakinaga na Real Madrid kuri stade ya Santiago Bernabeu.
Uyu mukinnyi wakamye ishashyi bigombeye kwihangana, watwaye Balon d'Or ku myaka 34, amasezerano ye ararangira mu mpera z'uku kwezi.
Uyu mukinnyi w'imyaka 35, aya mateka yayanditse nyuma yo kugirirwa icyizere n'umutoza we Carlo Ancelloti akamukinisha umukino we wa nyuma mu ikipe ya Real Madrid. Penaliti yatsinze ku munota wa 72 niyo yahise imigira ikinyamaswa kibasiriye Athletic Bilbao.
Iki gitego cyahise kimugira umukinnyi watsinze ikipe ya Athletic Bilbao ibitego byinshi kuko ubu Karim Benzema yayitsinze ibitego 18. Umukurikiye ni Cristiano Ronaldo wari umaze igihe afite ako gahigo kuko we yayitsinze ibitego 17 mu myaka icyenda.
Karim Benzema ntabwo tuzongera kumubona mu mwambaro wa Real Madrid. Nyuma yo kurangizanya na yo, azajya kurya amafaranga menshi yo muri Saudi Arabia. Ikipe ya Al-Itthad niyo uyu mukinnyi azakinira.
Al-Itthad ibonye Karim Benzema, Al-Nassir yo ifite Cristiano Ronaldo na Al-Hilal irashaka Lionel Messi. Aya makipe yose ni ayo muri Saudi Arabia. Bivuze ko shampiyona y'iki gihugu ishaka kugera ku rwego rukomeye cyane birenze uko imeze ubu.
Karim Benzema avuye muri Espagne hafi gusajisha inshundura za Athletic Bilibao
Eng
RSS 
TANGA IGITECYEREZO