Senegal: Abagera kuri 16 baguye mu myigaragambyo yatewe n’igihano cyahawe Ousumane Sonko

Ku ya 01 Kamena 2023, nibwo abashyigikiye umuyobozi w’abatavuga rumwe n’ubutegetsi bwa Senegal, Ousmane Sonko, batangiye imyigaragambyo i Dakar,mu murwa mukuru w'iki gihugu nyuma yo gufungwa imyaka 2 azira "ruswa mu rubyiruko."

Abigaragambyaga benshi bakomeretse mu gihe habaye imirwano ku munsi wa Gatatu n’inzego z’umutekano, nyuma y’igihano cyahawe uyu muyobozi.

Sonko, ushyigikiwe cyane n’urubyiruko rwo muri Senegal, yahanaguweho icyaha cyo gufata ku ngufu ariko ku wa Kane ahamwa n'icyaha cyo kwangiza urubyiruko, nk'uko amategeko ahana abiteganya muri iki gihugu ari “imyitwarire y'ubusambanyi” ku muntu utarageza ku myaka 21.

Abamushyigikiye bavuga ko iki cyemezo cyafashwe hashingiwe kuri politiki kubera ko Sonko ahanganye na Guverinoma ya Perezida Macky Sall mu matora ateganijwe umwaka utaha wa 2024.

Minisiteri y'ubutabera yavuze ko Sonko w'imyaka 48 atari ahari mu ifatwa ry’iki cyemezo kandi yagumye iwe ariko ashobora gutabwa muri yombi igihe icyo ari cyo cyose nyuma y'urubanza.

Iki gihano kiramutse gishizwe mu bikorwa, bishobora guhungabanya amahirwe ye yo kwiyamamariza umwanya wa Perezida w'umwaka utaha.

Sonko wahoze ari umugenzuzi w’imisoro waje ku mwanya wa gatatu n'amajwi 15% mu matora ya perezida wa 2019, ashobora kujuririra iki cyemezo mu minsi 15 aramutse yitabye.

Umwe mu bayobozi b'inzego z'umutekano muri Senegali, Ibrahima Diop, yatangaje ko abantu barenga 500 batawe muri yombi. Yavuze ko bamwe muri bo, ari abana bato ndetse n'abanyamahanga.

Diop yagize ati: "Abantu bafatiwe muri iyo myigaragambyo ahanini ni abantu bitwaje intwaro zikomeye." Yongeyeho ko bamwe mu bafashwe bari bafite ibyuma, imbunda ndetse n’ibindi.

Ku wa Kane, Minisitiri w’umutekano  mu gihugu, Antoine Felix Abdoulaye Diome, mu kiganiro n’abanyamakuru yavuze ko imbuga nkoranyambaga na porogaramu zohererezanya ubutumwa byari bibujijwe mu rwego rwo “kugabanya amakuru y’ibinyoma.”

Ku cyumweru, ishyaka rya politiki rya Sonko, Patriots of Senegal (PASTEF), ryamaganye ihagarikwa ry’abigaragambyaga, bavuga ko ari “igitutu cy’ubwicanyi” bari gushyirwaho n’inzego z’umutekano za Senegal.

Ishami  rya Amnesty International muri Senegal  ryahamagariye abayobozi gukora iperereza ku rupfu rw'abigaragambyaga.

Umuryango uharanira uburenganzira bwa muntu ku rubuga rwa tweeter, wagize uti: "Imbaraga rusange zigomba gukoreshwa gusa igihe bibaye ngombwa kandi mu buryo bukwiye."