Phil Peter azerekeza mu Bufaransa, Murindahabi asigare ku rugo

Ni ibiganiro byatangiye mu kwezi gushize kwa Gicurasi aho Muyoboke Alex usanzwe areberera inyungu z’abahanzi no gufasha gutegura ibitaramo, yaganiriye na 2 Pac ufite akabari kaberemo ibitaramo n’ibirori by’abo muri kano karere k’Afurika y’i Burasirazuba. Akabari kitwa Kigali Life Bar. 

Nyirako (Kigali Life Bar) avuka i Nyamasheke ahavuka Moses Turahirwa washinze Moshions, Bamporiki Edouard wiyemereye ko atunze Miliyali y'amanyarwanda, Nduwimana Jean Paul (Noopja) nyiri Country Fm, Country records, akaba anahagarariye Trace mu Rwanda ndetse vuba aratangiza Televiziyo (umushinga uri ku ziko). 

2 Pac umaze igihe mu mujyi wa Lyon, afatanya na Ange Diva ukora ibijyanye no kumurika imideri. Uyu Ange Diva abahanzi barimo Big Fizzo, Bwiza, Christopher Muneza, Riderman na Davis D ni we wabakiriye ubwo bajyaga gukorera ibitaramo mu mujyi wa Lyon.

Amakuru ahari kugeza ubu yemeza ko Dj Phil Peter azataramira (gucuranga, kuvanga imiziki) mu mujyi wa Lyon ku itariki 8 Nyakanga 2023. Azajyana na Muyoboke Alex ari nawe uri mu biganiro n’abandi basanzwe bazwiho gutegura ibitaramo ku mugabane w’u Burayi ku buryo bashobora kuzenguruka umugabe wose atanga umunezero.

Dj Phil Peter azerekeza i Burayi, Murindahabi asigare ku rugo

Abazi igiswahili bazi umugani (Methali) uvuga ngo ”Dalili ya mvua ni mawingu”. Mu Kinyarwanda usobanuye ko ibimenyetso by’imvura ari ibicu. Ku itariki 2 Kamena 2023 ku mbuga nkoranyambaga za Isibo Tv hashyizweho ifoto iha ikaze Murindahabi Irene, umunyamakuru, umushoramari mu byo kureberera inyungu z’abahanzi. 

Iyo foto yanditseho amagambo yerekana ko agiye kugaruka mu rugo. Ni byo hari ababyemeye ko ibiganiro byarangiye nta kabuza agiye kugaruka gukora ikiganiro Sunday Choice Live yahozemo we na Phil Peter. 

Ni byo ntabwo Phil Peter azurira indege ngo asige ikiganiro cyambaye ubusa kandi cyari ikirango cy’imyidagaduro ku Isibo Tv. Murindahabi yanyarukiye kuri Instagram ye ahakana ariya makuru. Ariko nta nduru ivugira ubusa. InyaRwanda ifite amakuru ko M.Irene yiteguye gusubira ku Isibo Tv.

Mbere y’ibihembo bya The Choice Awards 2022 byabereye muri Park Inn hotel mu Kiyovu bikagenda neza, hari ibiganiro byari byahuje umushoramari Kabanda Jean De Dieu, Phil Peter na Murindahabi. 

Biriya biganiro ntabwo byatanze umusaruro kuko icyari kigenderewe ni ukugarura mu rugo Murindahabi. Kudahuza byavuye ku ngano y’amafaranga Murindahabi yashakaga n’ayo ubuyobozi bwashakaga kumuha. Hano ntituyavuga kuko si yo inkuru ishingiyeho ariko ntibisobanuye ko atazwi.

Iyi foto ntabwo benshi bamenye igisobanuro cyayo (Instagram ya Phil Peter) nyamara bari basoje ibiganiro byo kugarura Murindahabi

Birashoboka rero ko ubuyobozi bwasanze nta yandi mahitamo ahari kuko hageragejwe abanyamakuru benshi basanga si bo bazi neza kiriya kiganiro kandi ntibari mu murongo wa Isibo Tv wo guteza imbere imyidagaduro, kuzana umubano mwiza hagati y’abahanzi n’igitangazamakuru no gushaka iterambere rya Televiziyo. Muribuka ko Fatakumavuta yageragejwe ntibitange umusaruro. 

Ni benshi bageragejwe ntibagwe mu byifuzo by’umushoramari. Hageragejwe uwitwa Jinalangu bifata ubusa. Hageragezwa Dc Clement arijyana. Hageragejwe Zaba na Lynda ari nabo bagihanyanyaza bari kumwe na Babu ukorana nabo ari kumwe na Phil Peter. 

Mu kuziba icyuho cy’umunyamakuru ujya gushaka ibiganiro (terrain) biri gukorwa na Fred Musoni wari usanzwe akoresha imbuga nkoranyambaga za Isibo Tv.

Ikiganiro rero kicazaga abakomeye bakarara ijoro bagihanze amaso ntabwo ubuyobozi bwa Televiziyo bwakwemera ko kirunduka kandi hakiri amahirwe yo kuminjiramo agafu. Hatagize igihinduka Murindahabi Irene aragaragara kuri iki Cyumweru tariki 4 Kamena 2023 muri Sunday Choice Live itangira ku isaha ya saa tatu kugeza saa sita z’ijoro. 

Hagize igihinduka nticyaba gitewe no kutumvikana byaba bitewe no gukomeza gukurura amarangamutima kuko Murindahabi yamaze gupfumbatishwa amafaranga yemeranyijeho na Jado Kabanda.

Murindahabi, kuba asubiye ku Isibo Tv bizongera icyanga cya Sunday Choice Live dore ko ikipe ya bombi yari nta makemwa yaba ku buryo bakoramo ikiganiro, ibyo batanga (content), umubano n’abahanzi, ndetse n’uko bari bamenyeranye banaziranye kuva ku Isango Star.

Ange Diva ni muntu ki?

Umunyamideri Ange Diva ahora ashaka icyateza imbere abahanzi nyarwanda aho afatanya na nyiri Kigali Life Bar gutegura ibitaramo bijyana abahanzi nyarwanda i Lyon. (instagram ya Ange Diva)

Uyu munyamideri werekeje muri France mu 2012, amaze kuba ingirakamaro ku bahanzi nyarwanda dore ko akomeje gufatanya na 2 Pac gutegura ibitaramo biha amahirwe abanyarwanda, abarundi bakajya gukirigita ku mayero no kuboneraho gufata amashusho y’indirimbo wongeyeho no gutembera. 

Ntabwo byoroshye kwerekeza i Burayi mu gihe umufuka wawe ujegajega kuko bisaba umuntu wo kukwishingira. Yavukiye i Gikondo mu karere ka Kicukiro akaba yarakuranye na ba Meddy binavugwa ko yagiye amufasha igihe yarimo arwana no kwamamara.

Ange Diva niwe wakira abahanzi nyarwanda bagiye i Lyon

Ange Diva anateganya kuzakira igitaramo kizaba ku itariki 10 Kamena (6) 2023 cyateguwe n’abo muri Cote d’Ivoire kizabera i Lyon kuri ariya matariki. 

Murindahabi ashimira kenshi Phil Peter nk’uwamubereye ikiraro cyo kugera ku bwamamare abikesha umwanya yamuhaye akigaragaza. Ni kenshi na Phil Peter ashimira Murindahabi ko atamutengushye ahubwo yafatiyeho akabyaza umusaruro amahirwe yahawe. 

Kuri ubu Murindahabi areberera inyungu z’abahanzi baririmba Gospel (Vestine na Dorcas) bitegura kwerekeza muri Canada mu bitaramo bitandukanye. Ni mu gihe Phil Peter avanga imiziki (Dj) akayobora ibirori (Mc), byose akabifatanya n’itangazamakuru (Entertainment Journalist).

Phil Peter na Irene barahuza cyane iyo barimo gukorana

Irene yabanje gusa nk'utera utwasi ibyo gusubira ku Isibo Tv ariko amakuru y'impamo ni uko agiye kongera kugaragara kuri iyi Televiziyo mu minsi ya vuba

Reba hano Terimometa ya Dj Phil Peter