Uganda: Abafana ba Arsenal bari bafunzwe barekuwe

Abafana umunani b'ikipe ya Arsenal bari batawe muri yombi na Polisi ya Jinja, barekuwe uyu munsi kuwa Gatatu nyuma y'iminsi ibiri bafunzwe bazira kwishimira intsinzi y'ikipe yabo ubwo yatsindaga Manchester United mu mukino w'ishiraniro wabaye ku cyumweeru tariki 22 Mutarama 2023.

Aba bafana ubwo bafatwaga kuwa Mbere  tariki 23 Mutarama 2023 bari bambaye umwambaro wa Arsenal ndetse bari bitwaje igikombe cy'igicurano.

Polisi yavuze ko nta burenganzira bari bafite bwo gutambagira mu byishimo batambagiranye. Abo bafana bafashwe baregwa kubangamira umudendezo  rusange wa rubanda.

Kuwa Kabiri itsinda ry’abashinzwe umutekano ryemeje ko barekurwa ariko bakaburirwa, nk’uko byemezwa na James Mubi, umuvugizi wa polisi muri ako karere Ka Jinja.

Umwe muri abo bafana barekuwe wiyita Ambasaderi wa Arsenal muri Uganda, yabwiye abanyamakuru ko bazasaba “uruhushya rwo kwishima mu gihe Arsenal yatwara igikombe cya Premier League”.  

Yagize ati: “Tuzakorera ibirori muri stade Bugembe”. 

Umuvugizi wa polisi yavuze ko abo bafana batazi n’iby’ibanze kuri iyo kipe – ko batazi igihe Arsenal yaciye umuhigo w’imikino myinshi idatsindwa, kandi bavuze ko uwahoze ari umunyezamu wa Uganda ari umukinnyi wa Arsenal. 

Arsenal ubu ni iya mbere muri Premier League irusha Manchester City, amanota atanu, ikeneye kwitwara neza mu mikino 19 isigaje kugira ngo itware iki gikombe iheruka mu 2004.

Inkomoko: BBC news