Impamvu 3 zishyira igikombe cya shampiyona y'u Bwongereza mu biganza bya Arsenal

Arsenal ni imwe mu makipe ari kwitwara neza ku mugabane w'u Burayi, kandi ikabikora mu marushanwa yose yitabira. Mu mikino 19 iyi kipe imaze gukina yasaruyemo amanota 50, kandi ni nayo iyoboye urutonde rwa Premier League. Manchester City ya kabiri irushwa na Arsenal amanota 5, kandi yo irusha umukino umwe Arsenal.

Kugeza ubu no muri Europa League, Mikel Arteta n'abahungu be naho bari kwitwara neza, kuko bamaze kwizera gukina 1/4 kandi biranashoboka ko bagitwara. Uku kwitwara neza bishobora gutuma Arsenal yongera kubona igikombe cya Premier League iheruka mu 19 ishize, dore zimwe mu mpamvu zatuma bacyegukana:

Kuba bafite ba myugariro bakomeye nk'urutare

Ikipe ya Arsenal ni imwe mu makipe afite imyanya yose ikomeye muri Premier League muri uyu mwaka w'imikino, kumenera inyuma ngo ujye gutsinda igitego biba bigoye. Mu mikino 19 ikipe ya Arsenal imaze gukina yinjijwe ibitego 16 gusa, niyo kipe ya kabiri yinjijwe ibitego bicye muri Premier League.

Arsenal yabashije gukina imikino 9 itinjizwa igitego na 1, nabwo iyi kipe niyo iza ku mwanya wa 2 mu makipe afite imikino myinshi itinjijwemo ibitego muri uyu mwaka w'imikino.

Gabriel Magalhães na William Saliba bagize ubufatanye bwiza kandi bukomeye inyuma hagati, mu gihe Aaron Ramsdale yerekana ubuhanga mu izamu akuramo ibitego byabazwe.

Oleksandr Zinchenko na Ben White na bo bitwaye neza mu myanya y'ibumoso n'iburyo, kandi abakinnyi bombi bitwara neza no mu buryo bwo kwataka. Ba myugariro baramutse bakomeje kwitwara neza batwara igikombe mu buryo bworoshye.

Ba myugariro ba Arsenal bakomeye 

Arsenal ifite abakinnyi basatira izamu bakomeye kandi bahamye

Ikipe ya Arsenal ifite abakinnyi bakina imbere bahumurirwa izamu ndetse n'inshundura, kuko kugeza ubu iyi kipe niyo ya kabiri muri shampiyona y'u Bwongereza imaze gutsinda ibitego byinshi muri uyu mwaka w'imikino, ifite ibitego 45.

Abahanga ndetse n'abakunzi b'umupira w'amaguru bavugaga ko kubera imvune ya Gabriel Jesús ikipe ya Arsenal kuzajya ibona ibitego bigiye kugorana, ariko nta kibazo kigeze kibamo ahubwo ibitego byabaye byinshi. Bukayo Saka na Eddie NKentia barakariye gutsinda.

Uko gukomeza gutsinda n’uwo bahuye nawe wese, ni urufunguzo rwo kwegukana igikombe cya shampiyona ya Premier League. Eddie NKentia aza mu bakinnyi 3 bamaze gutsinda ibitego byinshi muri shampiyona y'u Bwongereza kuva igikombe cy'isi cyarangira, ni uwa 3 afite ibitego 6.

Ba rutahizamu ba Arsenal bararyana

Nketiah uri mu bakinnyi bamaze gutsinda ibitego byinshi muri shampiyona y'u Bwongereza kuva igikombe cy'isi cyarangira

Kuba Arsenal ifite abakinnyi bafite inyota yo gutsinda

Ikipe ya Arsenal iheruka kwegukana igikombe cya Premier League muri 2004. Twavuga ko abakinnyi b’iyi kipe bafite ubushake buruta ubw'abandi bakinnyi bo mu yandi makipe, ndetse banashaka kugarurira icyubahiro ikipe yabo yahoranye muri rusange. Ibingibi ubibonera mu musaruro babona, mu mikino 9 iheruka Arsenal ntabwo iratsindwa umukino n'umwe.

Ikindi gikombe kitari Premier League cyaba gitunguranye kuri Arsenal, kuko bigaragarira buri wese ko aricyo bishoboka cyane gutwara.

Abakinnyi ba Arsenal mu mwaka ushize bashinjwaga kugira urwego rw'imitekerereze ruri hasi ariko ubu siko bimeze rwarazamutse cyane, wabibonera ku mukino baheruka gutsinda Manchester United.

Abakinnyi ba Arsenal bahorana inyota yo gutsinda

Arsenal mu mikino 9 iheruka ntabwo iratsindwa

Ubusesenguzi bw’umunyamakuru