Rafael York yasinyiye ikipe nshya

Ku mugoroba wo kuri uyu wa 18 Mutarama 2023, nibwo Gefle IF yanyujije ubutumwa ku rubuga rwa Instagram, imenyesha abafana ko yamaze gusinyisha Rafael York w'imyaka 23, ikaba imwishimiye kandi imutezeho umusaruro mwiza.

Muri ubwo butumwa, iyi kipe yatangaje ko York ubwe yavuze ko yishimiye gusinyira ikipe y'iwabo hafi y'aho yavukiye, ndetse ko yayitoranyije akanahitamo kuyikorera mu gihe hari andi makipe atandukanye yari yamusabye kuyasinyira.

York agenzura umupira

York wavukiye i Gavle muri Sweden si ubwa mbere agiye gukinira Gefle IF kuko muri 2016 yayikiniye by'igihe gito ari intizanyo ya Sandvikens IF ari nayo kipe yazamukiyemo atangira gukina umupira w'amaguru by'umwuga.

Yanatijwe kandi muri VFL Bochum yo mu Budage, mbere yo kunyura muri IFK Varnamo na Kalmar FF zo muri Sweden, aho yavuye yerekeza muri Esklistuna yakiniye kuva mu ntangiriro za 2021 kugeza mu mpera ya 2022, aho yagaragaye mu mikino 53 agatsindamo ibitego 8.

Ikipe ya Gefle Idrottsförening (Gefle IF) yasinyanye na Rafael York amasezerano y'imyaka 2 nibwo ikizamuka muri Shampiyona y'icyiciro cya kabiri, nyuma y'aho umwaka ushize yawusoje iyoboye amakipe yo mu itsinda rya kabiri mu cyiciro cya gatatu (Ettan Norra).

Gefle IF yashingiwe i Gavle ku ya 5 Ukuboza 1882, byumvikanisha ko imaze imyaka 140 ishinzwe. Yakirira imikino yayo kuri Stade ya Gavlevalen ifite imyaka 6500 yicarwamo n'abafana.

Rafael York wasinyiye ikipe yo ku ivuko, we ategereje kuzahamagarwa mu ikipe y' u Rwanda 'Amavubi' yitegura gukomeza guhatanira itike y'imikino ya nyuma y'igikombe cy'Africa cya 2023, aho muri Werurwe izatana mu mitwe n'ikipe ya Benin mu mikino ibiri.

Rafael asanzwe akina neza mu ikipe y'igihugu