APR WVC yegukanye igikombe cya shampiyona ya Volleyball

Nk'uko bisanzwe muri shampiyona y'umukino w'intoki wa Volleyball mu Rwanda, buri kipe yakira agace bitewe n'umunsi bagezeho, bivuze ko Ruhango VC ariyo yakiriye agace ka gatandatu kari kabitse udushya twinshi. Imikino yatangiye ku wa 6 hakinwa imikino y'abajonjora mu gihe ku cyumweru hakinwe imikino ya 1/2 ndetse n'imikino ya nyuma.

Nk’uko byagenze ku gace ka gatanu kabereye i Kigali, mu mikino ya 1/2 APR WVC yahuye na RRA WVC iyitsinda amaseti 3-1 naho Forefront itsinda Ruhango WVC yari yakiriye imikino amaseti 3-0. 

Umwanya wa gatatu RRA WVC nabwo yawegukanye itsinze Ruhango amaseti atatu ku busa, mu gihe umukino wa nyuma APR yatsinze Forefront amaseti 3-1, 18-25, 25-23, 25-16, 32-30. Aka gace karangiye APR WVC ari iya mbere n'amanota 7, ikurikirwa na Forefront ifite amanota 6, RRA WVC amanota 5 naho Ruhango WVC amanota 4.

APR WVC imaze gukina uduce 6 idatsinzwe 

Kuri ubu ku rutonde rusange, APR WVC ni iya mbere n'amanota 42, irusha amanota 6 ikipe ya Forefront ifite amanota 36, RRA WVC ikaza ku mwanya wa 3 n'amanota 30. 

Kuki APR WVC yegukanye igikombe cya shampiyona hakiri uduce 2 two gukina?

Tugendeye ku manota APR WVC, ikipe iyikurikiye amanota ifite ndetse n'uduce dusigaje gukinwa, byemerera APR WVC kwegukana igikombe cya shampiyona. 

Ubu APR WVC irarusha Forefront amanota 6 mu gihe habura uduce 2, niyo APR WVC itakitabira uduce 2 dusigaye twa shampiyona, yajya iterwa mpaga ikabona amanota 4 kuri buri gace yose hamwe akaba amanota umunani asanga ayo yari ifite. 

Icyo gihe niyo Forefront yaba iya mbere mu duce tubiri dusigaye, ntabwo yarusha amanota ikipe ya APR WVC ariyo mpamvu igikombe cya shampiyona cyamaze kuyigera mu biganza.

Ni uku urutonde rusange rwa shampiyona ruhagaze

Umutoza wa APR WVC Florien, nyuma y'agace ka Ruhango nawe yemezeje ko bamaze kwegukana igikombe cya shampiyona. Yagize ati: "Nibyo amahirwe 100% twegukanye igikombe cya shampiyona, ariko mbere na mbere nashimira Imana, abakinnyi ndetse n'ubuyobozi bw'ingabo z'u Rwanda kuko batubaye hafi kugira ngo twegukane uduce dutandatu twose twikurikiranya, mbese ni ibintu bishimishije cyane.  Uduce tubiri dusigaye tugiye kudokoresha mu buryo bwo gukomeza ikipe kugira ngo nidusohokera igihugu tuzabe duhagaze neza."

Igikombe APR WVC yegukanye kibaye icya kabiri itweye yikurikiranya kuko n'umwaka ushize ariyo yari yatwaye shampiyona. 

Siborurerema Florien umutoza mukuru wa APR WVC yashimiye uburyo abakinnyi be bitwaye muri iyi shampiyona ibura uduce 2, ndetse akemeza ko byose byatewe no gusenyera umugozi umwe