Ni Abahanzi ndetse n'aba Producers! Eddie Mico yambitse impeta Linda uvukana na Miss Amanda - AMAFOTO

Eddie Mico ni Umuhanzi, Umwanditsi, Umunyamakuru, Worship leader akaba na Producer. Yatangiye umuziki mu mwaka wa 2008, atangirira ku ndirimbo yise "I Live For You". Album ye ya mbere y'indirimbo 10 yitwa "You Are Amazing", ikaba yaratunganyijwe na Narrow Road Production mu 2011.

Uyu musore waminuje mu bijyanye n'Icungamutungo, akaba umukristo mu Itorero Angilikani, ni umwe mu bahanzi bakomeye mu muziki wa Gospel ndetse babereye benshi urugero rwiza. Indirimbo ze nyinshi ziri mu rurimi rw'Icyongereza.

Umwibuke mu ndirimbo "Real Swagg", "Connected", "Byose bicecetse", n'izindi. Ari mu bagize Akanama Nkemurampaka mu Irshanwa RSW Talent Hunt rizahemba Miliyoni 10 Frw umunyempano uzahiga agandi.

Mu 2013 uyu musore w'ijwi ritangaje akaba n'umuhanga mu kubyinira Imana, yaserukiye u Rwanda mu irushanwa rya Groove Awards ryaberaga muri Kenya, aho yari ahatanye mu cyiciro cy’umuhanzi w’umugabo mwiza w’umwaka muri Gospel (Best Gospel Male Artist) ndetse n'indirimbo ye “Real Swagga” yari iri guhangana mu zifite amashusho meza y’umwaka (Best Video of the year).

Uwo Eddie Mico tukubwiye mu ncamake agiye kurushinga!

Ntiharamenyekana itariki y'ubukwe bwe, gusa ni vuba nk'uko yabidutangarije. Mu ijoro ryacyeye ni ukuvuga tariki 11/12/2022 ni bwo yateye ivi yambika impeta umukunzi we Linda Rubango Kamikazi usanzwe ari umuhanzikazi ndetse akaba n'umu Producer wanabyize mu ishuri rya muzika rya Nyundo.

Yamwambitse impeta amutunguye cyane, ayimwambika ku munsi we w'amavuko ari nabyo byatumye inshuti ze zimufatisha nk'abagiye kwizihiza isabukuru y'amavuko, kumbi bari ku mugambi mutagatifu w'umukunzi we Eddie Mico. Umukobwa byamurenze ahita asuka amarira y'ibyishimo.

Nyuma y'uko Linda amubwiye YEGO, Eddie Mico wigeze gutangaza ko adashobora gushaka umukobwa udakijijwe, yabajijwe n'umunyamakuru wa inyaRwanda uko yiyumva, atangaza ko byamunejeje cyane. Ati "Ndishimye cyane, n'ubu ndacyashyira kuri gahunda ibintu byose". 

Twamubajije ibyo yagendeyeho ahitamo Linda mu bandi bakobwa bose, akamusaba kuzabana nawe iteka ryose, ahishura ko yamye asengera umukobwa umeze nk'uyu yambitse impeta. Ati "Ni nk'inzozi gusa ni amashimwe rwose. Kuva cyera nifuzaga ibintu nka bitatu cyangwa bine by'ingenzi: 

1) Kuba akunda Imana by'ukuri, 2) Kuba ankundira uwo ndiwe apana ibyo ndibyo gusa, 3) Kuba twumvikana kandi akunda abantu.....Linda rero ibyo byose yarabirengeje, gusa ni ugukora kw'Imana. Linda 'is special to me in more than a thousand ways' [arihariye kuri njye mu buryo burenze 1000] ntabona uko mbisobanura".

Ni couple y'aba Producers!

Bombi ni abahanzi mu muziki wa Gospel. Linda azwi cyane mu ndirimbo "Umubavu" yakoranye na Serge Iyamuremye [Kanda HANO uyirebe]. Ni indirimbo ivuga ko Imana itajya ibeshya, kandi ikaba Imana y'ukuri. Hejuru y'ibyo, ni na Producer akaba afite Studio ye bwite yitwa Heart Music Studio.

Birashoboka ko yaba ayifatanyije n'umukunzi we Eddie Mico nawe uherutse kwinjira mu byo gutunganya indirimbo, ibintu afatanya n'ubuhanzi no gukora itangazamakuru aho afite ikiganiro kuri Authentic Tv cyitwa "The Gospel Turn Up". Bombi ni abanyamuziki byahamye, by'akarusho Eddie Mico yongereye ijambo "Music" ku mazina ye akoresha kuri Instagram, ubu yitwa Eddie Mico Music.

Twitege iki kuri Eddie Mco na Linda, couple y'Abahanzi n'aba Producers?

Eddie Mico yasubije iki kibazo ati "Ni byo turi aba Producer b'umuziki n'abahanzi. Icyo batwitegaho ni uko hari imishinga mishya yacu ndetse n'iy'abandi twagiye dukorera zigiye gusohoka. Indirimbo nshya, yo iraje". 

Yavuze ko kwambika impeta umukunzi we ku munsi we w'amavuko, "nta mpamvu idasanzwe nabikoze,..ni uko cyari igihe cyiza kandi nanone nashakaga ko yishima".

Linda wambitswe impeta na Eddie Mico, ni umukobwa urimo kuminuza muri Mount Kenya University nyuma yo kurahura ubumenyi mu ishuri rya muzika rya Nyundo. Ni umutoza w'amajwi, umuririmbyi akaba n'umu Producer nk'uko twabivuze haruguru. 

Ni mukuru wa Saro Amanda wabaye Miss Talent mu irushanwa rya Miss Rwanda 2022 ryegukanywe na Miss Nshuti Divine Muheto, nyuma yo guhiga abandi mu kugaragaza impano. Amanda ni umuhanga cyane mu kuririmba anicurangira gitari cyangwa piano. 

Eddie yashinze ivi ku butaka

Linda na Eddie bahoberanye biratinda!

Linda byamurenze asuka amarira

Umunsi wateguwe ku isabukuru ya Linda

Baritegura kurushinga vuba

Linda na Eddie ni couple nshya y'abanyamuziki

Inshuti zabo zishimiye cyane intambwe bateye

Miss Amanda (yegeranye na Eddie) wabaye Miss Talent yitabiriye ibirori mukuru we Linda yambikiwemo impeta

Eddie Mico na Linda mu bihe byiza cyane by'urukundo

Umuraperikazi The Pink ni umwe mu bitabiriye ibi birori

Linda yambitswe impeta na Eddie Mico bakundanye urwo bagize ibanga igihe kinini

Ifoto y'urwibutso y'abitabiriye ibi birori Linda yambikiwemo impeta

REBA INDIRIMBO "BYOSE BICECETSE" YA EDDIE MICO

REBA INDIRIMBO "UMUBAVU" YA LINDA FT SERGE IYAMUREMYE