Uwabyaye cyangwa uwashatse ubu yemerewe kwitabira Miss Universe

Mu ukuboza uyu mwaka, iri rushanwa rizaba riba ku nshuro yaryo ya 71. Rizanye impunduka nshya zitamenyerewe mu marushanwa y'ubwiza nk’aho ubu umukobwa wabyaye cyangwa se umugore washakanye n'umugabo yemerewe kuryitabira, cyakora imyaka yo yagumishijwe hagati ya 20 na 28 y’amavuko.

Umuyobozi w'ikirenga wa Miss Universe, Paula Stughart atangaza izi mpinduka yagize ati “Buri mugore wese afite uburenganzira ku mubiri we kandi amahitamo y’ejo hashize yakoze ntakwiye kuba imbogamizi z’inzozi ze z’ejo hazaza.”

Izi mpinduka zasamiwe hejuru n'abantu benshi batandukanye babarizwa mu marushanwa y'ubwiza.

Andrea Meza ni umunya Mexico- kazi, afite imyaka 28 hamwe n’kamba rya Miss Universe 2020, yavuze ko icyemezo nk’iki cyari cyaratinze mu murongo wo guha imbaraga abagore n’abakobwa.

Ati “N’ubundi byari byaratinze! Umutima wanjye uranyuzwe. Ibi ni ibintu nakomeje kugenda nganira n'ubuyobozi bwa Miss Universe, igihe cyari iki.”

Hakunze kuvugwa inkuru z’uko uyu mukobwa yambitswe ikamba abana n'umugabo akajya ahora abyamaganira kure, n'amafoto yiswe ay’ubukwe bwe yasohotse yayateye utwatsi avuga ko byari ukwifotoza bisanzwe.

Miss Universe igiye kuba ku nshuro ya 71 hamwe n'impinduka nyinshi, u Rwanda ntiruraryitabira na rimwe, no muri uyu mwaka niko bizagenda.

Amarushanwa y'ubwiza akomeye u Rwanda rwitabira ni Miss World na Miss Earth, cyakora ugendeye ku bishoboka ni uko nayo u Rwanda rushobora kutazitabira ay'uyu mwaka, kubera ibibazo byabaye mu irushanwa rya Miss Rwanda mu mezi make ashize.

Umukobwa uzatorwa nka Miss Universe 2022, azasimbura umuhindekazi Harnaaz Sandhu.

Uyu mukobwa yambitswe ikamba mu birori byabereye mu Mujyi wa Eilat mu Majyepfo y’igihugu cya Isiraheli, ku wa 12 Ukuboza 2021.

Umuhindekazi Harnaaz Sandhu ni we wegukanye ikamba rya Miss Universe 2021