Peace Cup: Police FC yageze muri 1/2 nyuma yo gusezerera AS Kigali

Kuri uyu wa Gatatu itariki 5 Werurwe  ikipe ya AS Kigali yari yakiriye Police FC mu mukino wo kwishyura wa 1/4 mu gikombe cy'Amahoro umwaka w'imikino wa 2024-25.

Ni umukino AS Kigali yatangiye ifite gahunda yo kwishyura kuko umukino Police FC yari yakiriyemo AS Kigali warangiye Ku ntsinzi ya Police FC aho yatsinze 2-1.

Umukino watangiye Police FC yari ifite impamba y'ibitego 2-1 yataka ishaka kurangiza Umukino hakiri kare. 

Ku munota wa Gatanu gusa yabonye uburyo bwari bufitwe na Mugisha Didier ariko atera ishoti rito ryoroheye umuzamu Cyuzuzo Gael kuwukuramo.

Ku munota wa 13 AS Kigali yaje gufungura Amazamu mu buryo butunguranye kuko yabonye koruneli yatewe neza na Haruna Niyonzima maze umupira wijyana mu izamu ntawuwukozeho, ubwo Haruna Niyonzima aba atsinze igitego cya mbere cya AS Kigali.

Ku munota wa 23 AS Kigali yongeye kubona kufura ikomeye cyane nyuma y'ikosa Nsabimana Eric Zidane yakoreye Haruna Niyonzima ariko kufura Shaban Hussein ayitera Ku ruhande rw'izamu ryari ririnzwe na Niyongira Patience.

Ku munota wa 29 Police FC yabonye igitego cyo kwishyura nyuma y'ishoti rikomeye ryatewe na Ishimwe Christian maze umuzamu wa AS Kigali aruka umupira usanga umunya-Uganda Mandela Achraf ahagaze neza ahita atsinda igitego cya mbere cya Police FC maze amakipe yombi atangira gukina anganya igitego 1-1.

Ku munota wa 45+4 Police FC yabonye igitego cya kabiri cyatsinzwe na Djibrine Akuki nyuma y'umupira mwiza wari uzamuwe na Muhadjir Hakizimana. Igice cya mbere cyarangiye ari ibitego bibiri bya Police FC kuri kimwe cya AS Kigali.

Igice cya kabiri cyagarukanye imbaraga zidasanzwe Ku ruhande rwa AS Kigali yashakaga gutsinda ibitego bitatu ngo ibone itike ya kimwe cya kabiri. 

Ku munota wa 55 yabonye uburyo bwaturutse Ku ishoti rikomeye ryatewe na Hussein Shaban ariko umuzamu wa Police FC arahagoboka umupira awukuramo.

AS Kigali yagumye gukina ireba ko yabona igitego maze ku munota wa 90+2 umunya-Ghana Issah Yakubu akora umupira n'ukuboko batanga penaliti maze Penaliti ya AS Kigali itsindwa neza na Nshimiyimana Jospin.

Umukino warangiye amakipe yombi anganyije ibitego 2-2 maze Police FC ikomeza muri kimwe cya kabiri ku giteranyo cy'ibitego 4-3. Ubu Police FC itegereje ikipe izarokoka hagati ya APR FC na Gasogi United.

Police FC yasezereye AS Kigali mu gikombe cy'Amahoro

Mandela akimara gutsinda igitego yagaragaje umwambaro yifuriza iruhuko ridashyira Aboubakar Lawar uherutse kwitaba Imana azize impanuka ya Moto

Police FC yageze muri kimwe cya kabiri mu gikombe cy'Amahoro