Nyuma yo kwamburwa igitambaro cy’ubukapiteni, Aubameyang yahawe ikindi gihano gikomeye muri Arsenal

Mu ntangiriro z’iki cyumweru nibwo byatangajwe ko Aubameyang yambuwe igitambaro cy’ubukapiteni muri Arsenal nyuma y’imyitwarire idahwitse yagaragaje muri iyi kipe.

Aubameyang wari umaze iminsi adahagaze neza mu kibuga, ntiyakinnye imikino ibiri ikipe ye iheruka gukina na Southampton na West Ham United muri shampiyona y’u Bwongereza.

Umutoza mukuru w’ikipe ya Arsenal, Mikel Arteta yemeje ko Aubameyang atazagaragara mu mukino wa Leeds United kuri uyu wa Gatandatu.

Ikinyamakuru Daily Telegraph kivuga ko uyu rutahizamu atitezwe mu myitozo hamwe n’ikipe ya mbere, mbere y'uko yerekeza mu gikombe cya Afurika mu mpera z'uku kwezi, aho azaba akinira ikipe y’igihugu ya Gabon.

Daily Mail yongeyeho ko Arsenal yiteguye kureka Aubameyang akishakira indi kipe muri Mutarama 2022, aho ikipe ya Barcelona iri mu makipe amwifuza guhera mu mezi 12 ashize.

Nubwo amakipe amwifuza ashobora kwakirwa mu byumweru biri imbere, gusohoka mu mpeshyi birashoboka cyane kuri uyu mukinnyi usa n’uwatakarijwe icyizere muri Arsenal.

Kuva uyu mwaka w’imikino watangira, Aubameyang afite ibitego 4 mu mikino yose amaze gukinira Arsenal, imibare itari myiza na gato kuri rutahizamu uba witezweho guheka ikipe.

Aubameyang ashobora gusohoka muri Arsenal umwaka utaha