Exclusive: Hari amakipe turi kuvugana, muri Rutsiro FC twari dufite umwihariko – Umuzamu Dukuzeyezu Pascal-VIDEO

Mu kiganiro na InyaRwanda Tv, umuzamu w'ikipe y'igihugu Amavubi Dukuzeyezu Pascal, yagarutse kuri byinshi harimo n'ibyamuranze mu myaka y'ubuzima bwe bw'umupira w'amaguru. Dukuzeyezu Pascal yavukiye mu karere ka Kayonza i Karubamba, aho yize amashuriye abanza ahazwi nko ku muzizi ndetse aba ari naho ayasoreza.

Dukuzeyezu ubu yari yasuye InyaRwanda LTD 

Mu 2009 nibwo Pascal yatangiye amashuri yisumbuye, ubwo yerekezaga mu kigo cya Aspej Rwamagana ari naho yatangiye kwigaragariza nk'umuzamu ukomeye, kuko iki kigo cyari gifite ikipe ikina ikiciro cya kabiri.

Dukuzeyezu Pascal wagiriye ibihe byiza muri Kiyovu Sport, avuga uburyo yisanze muri iyi kipe akiga mu kiciro rusange. Yagize ati: “Ngeze muri Aspej Rwamagana nahakinnye umwaka umwe gusa, mpita nerekeza muri Kiyovu Sport. Nageze muri Kiyovu Sport nkiga mu kiciro rusange cy’amashuri yisumbuye, ndetse bibanza kungora kuko nari ngeze ku rwego ntamenyereye. Ngera muri Kiyovu Sport, nasanzemo umuzamu Djuma Pongo wakomeje no kuba umuzamu wa mbere kugera nka 2011, nanjye nahise ninjira mu izamu.

Nyuma yo kubona umwanya ubanzamo, Pascal yaje guhamagarwa mu ikipe y'igihugu yatozwaga na Micho, ndetse aba umukinnyi kuva icyo gihe kugeza ubu wazamuwe na Kiyovu Sport agahamagarwa mu Mavubi makuru. Pascal avuga ko ko umupira kuriwe ari ubuzima kandi wamufashije. Ati: “Umupira w'amaguru ni ubuzima. Kuri njye narize kubera umupira w'amaguru, kandi na n’ubu ndacyiga kubera ruhago, niga muri UTB  ibijyanye na Hotel kandi umupira ufasha byinshi kuko niwo udutunze."

Dukuzeyezu Pascal, mu mwaka we wa nyuma muri Kiyovu Sport yaje kuvunika imvune yatumye amara imyaka ibiri yicaye, ariko nyuma amaze gukira agaruka mu kibuga ari umukinnyi wa Marine FC.

Kubijyanye n’ejo hazaza ha Dukuzeyezu Pascal, yemeza ko agifite byinshi byo gutanga ndetse ko yifuza kugaruka mu kibuga. Ati: “ Kugeza ubu nta kipe mfite, ariko hari amakipe turi kuvugana ndetse yewe na Rutsiro FC nahozemo turi mu biganiro, hari n'andi makipe yo muri Kigali turi kuvugana n'ubwo bitaratungana ariko biri kugenda neza. Nshaka kugaruka mu ikipe y'igihugu, ariko kugira ngo ubigereho uba unagomba gukinira amakipe akugaragaza."

Dukuzeyezu Pascal nyuma yo kuva muri Marine FC yerekeje mu ikipe ya Heroes FC, nayo yavuyemo agana muri Rutsiro FC yemeza ko ifite abayobozi bakunda umupira w'amaguru, ku buryo butangaje.

Ikiganiro ku buryo bw'amashusho