Kigali
Bralirwa
-->

Rayon Sports yasinyishije rutahizamu w’umunya-Maroc wakiniraga Raja Cassablanca

Yanditswe na: SAFARI Garcon
Taliki:25/09/2021 19:21
0

Ikipe ya Rayon Sports yamaze gutangaza ko yasinyishije rutahizamu Rharb Youssef wakiniraga Raja Cassablanca yo muri Maroc, ku ntizanyo y’umwaka umwe ushobora kongerwa.



Ku mugoroba wo kuri uyu wa Gatandatu tariki ya 25 Nzeri 2021, ni bwo Rayon Sports ibinyujije ku rukuta rwayo rwa Twitter, yatangaje ko yamaze gusinyisha amasezerano y’umwaka umwe rutahizamu Rharb Youssef, nk’intizanyo y’iyi kipe baheruka kugirana amasezerano y’ubufatanye buzamara imyaka Itanu.

Yagize iti "Tunejejwe no gutangaza ko twasinyije rutahizamu Rharb Youssef w’imyaka 21 ku ntizanyo ya Raja Casablanca". Youssef w’imyaka 21 yazamukiye mu makipe y’abato ba Raja Casablanca, ni umukinnyi ukina ataha izamu, akaba yatijwe Rayon Sports aho yayisinyiye amasezerano y’umwaka umwe ushobora kongerwa.

Muri Nyakanga 2021, nibwo Rayon Sports na Raja Cassablanca bagiranye amasezerano y’ubufatanye azamara imyaka Itanu, aho muri aya masezerano harimo n’ingingo yo gutizanya abakinnyi. Ku ikubitiro, Raja Cassabalanca yatije Rayon Sports abakinnyi babiri, nyuma y’amezi abiri bagiranye amsezerano.

Rharb Youssef yakurikiye Ait Lahssaine Ayoub ukina mu kibuga hagati nawe wamaze gutizwa Rayon Sports.

Ubufatanye Rayon Sports yasinyanye na Raja burimo ko Raja Casablanca izajya itiza abakinnyi Rayon Sports FC, ikazajya inayifasha mu bikorwaremezo, gukorera umwiherero muri Maroc, kongera imbaraga mu buvuzi, kuzamura impano ku ngimbi z’iyi kipe yaboneye izuba i Nyanza no kujya zikina imikino ya gicuti, ibijyanye n’ikoranabuhanga n’ibindi.

Raja Casablanca ni yo kipe ikunzwe na benshi muri Maroc. Ni yo ibitse igikombe gihuza amakipe yatwaye ibikombe iwayo ’CAF Confederation Cup’ cya 2020/21. Ibitse ibikombe 12 bya shampiyona, bitatu bya CAF Champions League, bibiri bya CAF Confederation Cup. Ibitse ibikombe birenga 31 byose hamwe harimo n’ibindi yagiye yegukana.

Rharb Youssef wakiniraga Raja Cassablanca yatijwe Rayon Sports umwaka umwe ushobora kongerwa






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND