Volleyball: Ikipe y’u Burundi yaraye rwa ntambi ku kibuga cy’indege yabuze ibihumbi 450 Frw byo kwipimisha COVID-19 - AMAFOTO

Iyi kipe y’igihugu y’u Burundi, yamaze amasaha 22 ku kibuga cy’indege cya Melchior Ndadaye nyuma y'uko Ishyirahamwe ry’umukino wa Volleyball i Burundi rikubise inzu ibipfunsi rikabura ibihumbi 450 Frw byo gupimisha abakinnyi COVID-19.

Binyuze ku rubuga rwa Twitter, ikinyamakuru Ikiriho cyanditse ko abakinnyi 11 muri 16 bari mu Rwanda ndetse n’umutoza wabo, ari bo baraye ku kibuga cy’indege mu gihe abandi bane bikoze ku mufuka bakiyishyurira bakabona gutaha.

Shampiyona Nyafurika ya Volleyball mu Bagore yabereye mu Rwanda, yasojwe ku Cyumweru, bukeye bwaho ku wa Mbere, ibihugu bitangira gusubira i wabo, gusa ibyabaye ku Barundikazi ni ‘akamaramaza’ nk’uko bakunda kubyivugira nyuma yo kumara amasaha 22 ku kibuga cy’indege babuze uko bipimisha COVID-19.

Iyi shampiyona yosojwe igikombe cyegukanwe na Cameroun itsinze Kenya ku mukino wa nyuma amaseti 3-1, iba inshuro ya gatatu yikurikiranya iki gihugu gitwara igikombe. U Burundi bwasoje irushanwa ku mwanya wa Munani.

Abarundikazi baraye rwa ntambi ku kibuga cy'indege i Bujumbura

Ikipe y'igihugu y'u Burundi yamaze amasaha 22 ku kibuga cy'indege

U Burundi bwasoje irushanwa ku mwanya wa Munani