Kigali

Urubyiruko rwibumbiye muri AFRIYAN rurasaba ko urubyiruko rwahabwa ijambo mu gufata ibyemezo ndetse na politiki igihugu kigenderaho

Yanditswe na: Niyibizi Honoré Déogratias
Taliki:14/09/2021 8:08
0

U Rwanda ni kimwe mu bihugu bifite politiki iha amahirwe urubyiruko, icyakora haracyari icyuho cy’uruhare rw’urubyiruko mu guhabwa ijambo mu gufata ibyemezo na politiki igihugu kigenderaho.



Mu gihe  hasozwaga amahugurwa y’abahagarariye imiryango itandukanye y’urubyiruko, Ihuriro ry’Imiryango y’Urubyiruko yiga ku Buzima bw’Imyororokere, ‘Afriyan Rwanda’, ryagaragaje ko urubyiruko rukwiriye guhabwa ijambo mu gufata ibyemezo ndetse na politiki igihugu kigenderaho.

Aya mahugurwa akaba yarahurije hamwe urubyiruko rugera kuri 30, rwaturutse mu mahuriro y’urubyiruko atandukanye. Aya mahugurwa yatanzwe ku bufatanye bwa Afriyan Rwanda, RWAMREC na Health Development Initiative (HDI) binyuze muri gahunda izwi nka ‘Generation G Programme’. Mu busanzwe iyi gahunda igamije guharanira ko ijwi ry’urubyiruko ryumvwa, rigahabwa agaciro, ndetse no kwimakaza uburinganire muri sosiyete.

Mu gihe hasozwaga aya mahugurwa, umuyobozi ushinzwe ibikorwa muri AFRIYAN Rwanda, Bwana NIYIBIZI Evode, yatangaje ko “U Rwanda rwateye intambwe ishimishije binyuze mu bushake bwa politiki, rushyigikira uruhare rw'ingimbi n'urubyiruko mu iterambere ry'igihugu. Icyakora, hakenewe gushakisha no gukemura inzitizi zinyuranye, zituma urubyiruko rutagira uruhare runini mu gufata ibyemezo”.

Mu gusoza ijambo rye, yakomeje avuga ko kugira ngo ibi bigerweho, urubyiruko rukwiriye guhabwa ubumenyi buhagije ndetse no kongererwa ubushobozi. Yagize ati “Kugira ngo tubigereho, dukeneye kongerera ubushobozi ingimbi n'abangavu kugira ngo bashobore kugira uruhare runini mu kwerekana ibitekerezo byabo, ndetse no gutegura ibisubizo kugira ngo bakemure ibibazo by'ingutu bahura nabyo”.

Umwe mubari bitabiriye aya mahugurwa, UWAMUNGU Marie Ange Raissa, Umuyobozi mukuru wa “Impanuro Girls Initiative”, yavuze ko mu Rwanda abaturage bari munsi y’imyaka 30 bangana na 60% by'abaturage muri rusange; ibi bikaba bigaragaza ko urubyiruko rutagomba kwibagirana igihe hafatwa ibyemezo bitandukanye, ahubwo rugomba guhabwa ijambo mu byemezo bifatwa.

Muri aya mahugurwa urubyiruko rwahuguwe n'abantu batandukanye

Urubyiruko rwitabiriye aya mahugurwa ruteze amatwi ngo ruhabwe ubumenyi butandukanye

 

 






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND