RFL
Kigali

Kuba Kylian Mbappé atari ahari si urwitwazo rwo gutsindwa – Pochettino nyuma yo gusezererwa na Man City

Yanditswe na: SAFARI Garcon
Taliki:5/05/2021 9:44
0

Umutoza wa Paris Saint-Germain ‘PSG’ Mauricio Pochettino yanze kwitirira isezererwa ry'ikipe ye muri UEFA Champions League ikuwemo na Manchester City ku kuba rutahizamu we Kylian Mbappé watwaye igikombe cy'Isi ari kumwe n'u Bufaransa atari ahari.



Mbappé, w'imyaka 22, yari umusimbura utakinishijwe kubera imvune yo ku mpfundiko, mu mukino wo ku wa Kabiri wo kwishyura muri ½  Manchester City yatsinzemo PSG ibitego 2-0, biba 4-1 mu mikino yombi, ihita inayisezerera.

Pochettino, wageze muri PSG mu kwezi kwa mbere uyu mwaka, yagize ati: "Bari [Man City] ba mudahusha. Nshimiye Manchester City, barimo kugira umwaka mwiza w'imikino".

Nta Mbappé, PSG yananiwe kumenera muri ba myugariro ba Man City ndetse ntiyatera ishoti mu izamu, n'uwakinnye mu mwanya we Mauro Icardi ntiyatanga umusaruro.

Pochettino, wagejeje Tottenham ku mukino wa nyuma wa Champions League mu 2019, yongeyeho ati: "Kuriya [kubura kwa Mbappé] ntabwo gushobora kuba urwitwazo. Turi ikipe. Birumvikana, ni ibyago kuba atari ameze neza ngo afashe ikipe, ariko ibyo si urwitwazo. Ntabwo twakoresha urwo rwitwazo kuko imikinire y'ikipe yari myiza".

"Twakinnye umukino twari twateganyije gukina. Twatangiye rwose neza, turema uburyo bwavamo igitego ndetse tuganza Manchester City. Ibyo si ibintu byoroshye".

"Rimwe na rimwe mu mupira w'amaguru ukenera ijanisha runaka ry'amahirwe mu bice bimwe by'umukino. Batsinze mu gihe twarimo tubotsa igitutu cyane n'umupira muremure. Abakinnyi bose baraza kumva bababaye. Twakoze neza. Gahunda, umukino wari mwiza. Ubu ni ubwoko bw'umukino aho ukenera ko amahirwe agusekera".

Mu mukino ubanza, Idrissa Gueye wa PSG yeretswe ikarita itukura, ndetse no mu mukino wo kwishyura kwa City ku kibuga Etihad, nabwo PSG basoje umukino ari abakinnyi 10 nyuma y'uko Angel Di Maria yeretswe ikarita itukura kubera gutera umugeri Fernandinho. Pochettino ati: "Ikarita itukura ya Di Maria yahinduye uko twiyumvaga".

Ibitego bibiri bya Man City byose byinjijwe na Riyad Mahrez ku munota wa 11 no ku wa 63, afasha ikipe ye kugera bwa mbere ku mukino wa nyuma wa Champions League.

Umutoza wa Man City, Pep Guardiola yagize ati: "Ntewe ishema cyane kandi nifatanyije n'abakinnyi batakinnye uyu munsi. Bari bakwiye gukina, buri muntu yagize uruhare none ubu cyari igihe cyo kubyishimira..."

"Bari [PSG] bashyize abakinnyi benshi hagati biratugora cyane mu gice cya mbere... nuko duhindura mu gice cya kabiri... kandi gutsinda 4-1 muri rusange ku ikipe yatsinze Barcelona na Bayern Munich bivuze ikintu kinini kuri twe".

"Abantu batekereza ko byoroshye kugera ku mukino wa nyuma wa Champions League. Kugera ku mukino wa nyuma ubu bigize icyo bisobanuye ku byo twakoze mu myaka ine cyangwa itanu ishize".

Man City yasubiriye PSG iyitsindira Etihad 2-0 ihita iyisezerera muri Champions League

Mbappe ufite imvune ntiyagaragaye muri uyu mukino

Pochetino yavuze ko kuba atari afite Mbappe atari rwo rwitwazo rwo gutsindwa





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND