RFL
Kigali

European Super League mu marembera! Amakipe yose yo mu Bwongereza yikuye mu irushanwa abayobozi bamwe baregura

Yanditswe na: SAFARI Garcon
Taliki:21/04/2021 9:57
0

Amakipe yose atandatu yo mu Bwongereza yamaze kwikura mu irushanwa rya European Super League ryari riteganyijwe gutangira umwaka utaha, nyuma y’igitutu gikomeye cy’Abafana ndetse na Leta y’u Bwongereza, byanatumye bamwe mu bayobozi b’amakipe begura.



Ku Cyumweru tariki ya 18 Mata 2021, ni bwo irushwanwa rya European Super League ryatangajwe ku mugaragaro ndetse ritangirana amakipe 12 mu makipe 20 yagombaga kuzaba arigize, arimo atatu yo mu Butaliyani, atatu akomeye muri Espagne n’andi atandatu yo mu Bwongereza.

Nyuma y’iri tangazo abafana b’amakipe atandukanye mu Bwongereza ntibishimiye icyemezo cyafashwe n’amakipe bakunda kuko babona iri rushanwa rije gusenya ruhago y’i Burayi by'umwihariko shampiyona y’u Bwongereza ndetse no kwica umwimerere w’umupira w’amaguru, birara mu mihanda bafite ibyapa byamagana iri rushanwa n’amakipe yarigiyemo.

Leta y’u Bwongereza nayo ntiyatanzwe kuko yahagurutse yamagana yivuye inyuma iri rushanwa. Minisitiri w'intebe w'u Bwongereza Boris Johnson, yamaganye icyemezo cy'amakipe atandatu yo mu Bwongereza yemeye kwinjira muri iri rushanwa ndetse anavuga ko agiye gukora ibishoboka byose agahagarika iki gitekerezo.

Impuzamashyirahamwe y’Umupira w’Amaguru i Burayi (UEFA) ku bufatanye na shampiyona eshatu zikomeye kuri uwo mugabane, yamaganye yivuye inyuma icyemezo cy’amakipe 12 akomeye arimo atandatu yo mu Bwongereza, yemeye kujya muri uyu mushinga mushya w’irushanwa rya European Super League.

Mu itangazo yashyize hanze ku Cyumweru, UEFA yavuze ko izakoresha ingamba zose zishoboka mu guhagarika uyu mushinga w’irushanwa “rishingiye ku nyungu za bamwe”.

Yavuze ko kandi “Amakipe azaryitabira azahagarikwa mu yandi marushanwa yaba ayo ku rwego rw’Isi, i Burayi no mu bihugu byabo, abayakinira ntibazaba bemerewe gukinira ibihugu byabo”.

Impuzamashyirahamwe y'umupira w'amaguru ku isi, FIFA, mbere yatangaje ko idashobora kwemera irushanwa nk'iri, ko umukinnyi wese uzarijyamo atazemererwa gukina igikombe cy'isi.

Nyuma y’igitutu gikomeye aya makipe yashyizweho n’abafana ndetse n’ubuyobozi bw’umupira w’amaguru mu nzego zitandukanye kugeza kuri Leta y’u Bwongereza, mu ijoro ryo kuri uyu wa kabiri tariki ya 20 Mata 2021, nibwo amakipe yo mu Bwongereza yose uko ari 6 yikuye muri Super League ndetse bamwe mu bayobozi b’amakipe baregura.

Manchester City na Chelsea nizo zabimburiye izindi mu gutangaza ko zikuye muri iri rushanwa rishya ryari rigiye kuvuka i Burayi, Manchester United, Liverpool, Arsenal na Tottenham nazo zahise zitangaza ko zikuye muri iri rushanwa.

Mu itangazo Arsenal yashyize ahagaragara, yasabye imbabazi abafana, ivuga ko yakosheje, ariko yaharaniraga kubaka ikipe ifite ubushobozi.

Yagize iti “Twakoze ikosa, kandi turarisabira imbabazi. Turabizi ko bizafata igihe kugira ngo mutugarurire icyizere mu byo dushaka kugeraho muri Arsenal, ariko reka tubabwize ukuri ko icyemezo cyo kujya muri Super League cyari cyatewe n’ubushake bwo kurinda Arsenal, ikipe mukunda, no gushyigikira umukino mukunda binyuze mu kwishyira hamwe kwisumbuyeho no kugira ubukungu buhamye”.

Bamwe mu bayobozi b’amakipe yemeye kujya muri iri rushanwa bari ku gitutu gikomeye ndetse bamwe batangiye gutekereza uburyo basezera. Ed Woodward wari umaze imyaka umunani ayobora Manchester United, ariko bikaba byatangajwe n’iyi kipe ko azasezera ku mpera z’uyu mwaka wa 2021.

Amakuru avuga ko uyu mugabo w’imyaka 49, yari asanzwe afite gahunda yo kwegura ku mirimo ye, ariko nyuma y’uko uyu mushinga ibyawo bisa n’ibijemo kidobya, icyemezo cye gishobora gushyirwa mu bikorwa hakiri kare.

Undi bivugwa ko yaba yeguye ni Andrea Agnelli uyobora Juventus ndetse akaba yaragizwe umwe mu bayobozi bungirije ba Super League, ariko iyi kipe yo mu Butaliyani yanyomoje ayo makuru.

Igitutu cy'abafana cyatumye amakipe yose yo mu Bwongereza yikura muri European Super League

Nta kipe n'imwe yo mu Bwongereza ikirangwa muri European Super League

Minisitiri w'intebe w'u Bwongereza Borris Johnson yari yatangaje ko agiye gukora ibishoboka byose agashyira iherezo kuri European Super League





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND