RFL
Kigali

Minisitiri Borris Johnson ku isonga mu mugambi wo gushyira iherezo kuri European Super League yarikoroje i Burayi

Yanditswe na: SAFARI Garcon
Taliki:20/04/2021 12:28
0

Minisititi w’intebe w’u Bwongereza, Boris Johnson yagaragaje ko adashyigikiye na gato irushanwa rya European Super League ndetse ko yiteguye gukora ibishoboka byose kugira ngo ahagarike igitekerezo cyaryo kitarafata indi ntera kuko asanga rije kwica umwimerere w’umupira w’amaguru i Burayi.



Ku Cyumweru tariki ya 19 Mata 2021, nibwo hatangajwe irushanwa rishya rigiye kuvuka i Burayi rizajya rikinwa n’amakipe 20 y’ubukombe kuri uwo mugabane ‘European Super League’.

Ku ikubitiro iri rushanwa ryatangijwe n’amakipe 12 atarimo ikipe n’imwe yo mu Budage cyangwa mu Bufaransa, kuko harimo atandatu yo mu Bwongereza, atatu yo mu Butaliyani ndetse n’andi atatu yo muri Espagne.

Ayo makipe ayobowe na Real Madrid, FC Barcelona na Atletico Madrid zo muri Espagne, AC Milan, Inter Milan na Juventus zo mu Butaliyani, Liverpool, Arsenal, Chelsea, Manchester City, Manchester United na Tottenham zo mu Bwongereza.

Nyuma y'uko amakipe atandatu ya mbere akomeye mu Bwongereza afashe icyemezo cyo kwinjira muri iri rushanwa rishya, byakuruye impaka ndende mu nzego zitandukanye, ahanini bibanda ku hazaza h’umupira w’amaguru i Burayi.

Minisitiri w'intebe w'u Bwongereza Boris Johnson, yamaganye icyemezo cy'amakipe atandatu yo mu Bwongereza yemeye kwinjira muri iri rushanwa ndetse anavuga ko agiye gukora ibishoboka byose agahagarika iki gitekerezo.

Uyu muyobozi yavuze ko nubwo atari umuhanga mu bijyanye n’umupira w’amaguru ariko intego za European Super League zigaragarira buri wese, kandi ko atari nziza kuri ejo hazaza ha ruhago y’i Burayi.

Borris avuga ko iri ari irushanwa rifitiye inyungu abantu ku giti cyabo, barajwe ishinga no kwigwizaho amafaranga, bizica umwimerere w’umupira w’amaguru ndetse binateze igihombo ku makipe azaba asigaye, ingaruka zibe kurindimuka ka ruhago y’u Burayi.

Uyu muyobozi wemeza ko Premier League by’umwihariko izagirwaho ingaruka n’iri rushanwa, yavuze ko hazafatwa ingamba zikakaye zirimo no kubuza amakipe ari muri iri rushanwa kwinjira mu Bwongereza.

Impuzamashyirahamwe y’Umupira w’Amaguru i Burayi (UEFA) ku bufatanye na shampiyona eshatu zikomeye kuri uwo mugabane, yamaganye yivuye inyuma icyemezo cy’amakipe 12 akomeye arimo atandatu yo mu Bwongereza, yemeye kujya muri uyu mushinga mushya w’irushanwa rya European Super League.

Mu itangazo yashyize hanze ku Cyumweru, UEFA yavuze ko izakoresha ingamba zose zishoboka mu guhagarika uyu mushinga w’irushanwa “rishingiye ku nyungu za bamwe”.

Yavuze ko kandi “Amakipe azaryitabira azahagarikwa mu yandi marushanwa yaba ayo ku rwego rw’Isi, i Burayi no mu bihugu byabo, abayakinira ntibazaba bemerewe gukinira ibihugu byabo”.

Impuzamashyirahamwe y'umupira w'amaguru ku isi, FIFA, mbere yatangaje ko idashobora kwemera irushanwa nk'iri, ko umukinnyi wese uzarijyamo atazemererwa gukina igikombe cy'isi.

Abakomeje kunenga iri rushanwa, bavuga ko ritwawe gusa n'inyungu y'amafaranga, kandi rishobora kwangiza shampiyona zo mu bihugu ndetse ribusanye n'umwimerere wa ruhago.

Amakipe atandatu yo muri Premier League yemeje kuzitabira irushanwa rya European Super League

Minisitiri w'intebe w'u Bwongereza, Borris Johnson yavuze ko agiye gukora ibishoboka byose agahagarika igitekerezo cya European Super League

Amakipe yinjiye muri European Super League ashobora gufatirwa ibihano bikomeye






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND